რიანამ ინდოეთის მთავრობის მრისხანება მას შემდეგ დაიმსახურა, რაც 2 თებერვალს ტვიტერზე ინდოელი ფერმერების პროტესტს მხარი დაუჭირა. გასულ კვირას ფერმერების პროტესტი პოლიციასთან დაპირისპირებაში გადაიზარდა, რის შემდეგაც ინდოეთის მთავრობამ დედაქალაქის ნაწილს ინტერნეტზე წვდომა შეუზღუდა. რიანამ ტვიტერზე ამ ფაქტის შესახებ CNN-ის სტატია გააზიარა და ჰეშთეგით #FarmersProtest ფერმერებს მხარდაჭერა გამოუცხადა.

"ამაზე რატომ არ ვლაპარაკობთ?" — დაწერა ბარბადოსელმა მომღერალმა.

მომღერლის პოსტსა და ინდოეთში მიმდინარე მოვლენებს უამრავი ადამიანი გამოეხმაურა, მათ შორის, ინდოეთის მთავრობაც. საგარეო საქმეთა სამინისტროს განცხადებით, მსგავს მოვლენებზე კომენტარის გაკეთებამდე, ადამიანებმა ფაქტები სათანადოდ უნდა გადაამოწმონ. განცხადებაში განსაკუთრებული ყურადღება სელებრითებზეა გამახვილებული.

რიანას პოსტმა ინდოეთის პრემიერ-მინისტრის მხარდამჭერების უკმაყოფილებაც გამოიწვია. ხოლო ბოლივუდის ცნობილმა მსახიობმა, კანგანა რანაუტმა რიანას "სულელი" უწოდა.

ინდოელი ფერმერების პროტესტი აგრიკულტურის მიმართულებით ახალმა სამთავრობო რეგულაციებმა გამოიწვია. რეფორმა აგრიკულტურის სფეროში სახელმწიფოს როლის შემცირებასა და დამოუკიდებელი მყიდველებისა და ინვესტორებისთვის მეტი თავისუფლების მიცემას გულისხმობს. ფერმერები შიშობენ, რომ სახელმწიფოს დამცავი ღონისძიებების გარეშე, მსხვილი კორპორაციების გულმოწყალების იმედად ცხოვრება მოუწევთ. ფერმერებს მხარდაჭერა გრეტა თუნბერგმაც გამოუცხადა.