პარლამენტის თავმჯდომარის, არჩილ თალაკვაძის თქმით, ქართულ ოცნებას ოპოზიციის მოთხოვნა რომ გაეთვალისწინებინა და 2020 წლის საპარლამენტო არჩევნები სრულად პროპორციული სისტემით ჩაეტარებინა, მმართველი პარტია კიდევ უფრო მეტ მანდატს მიიღებდა. ასე შეაფასა თალაკვაძემ საარჩევნო სისტემაში შეტანილი ცვლილებები პარლამენტის საქმიანობის 2020 წლის შეჯამებისას.

"პირველად, უახლეს ისტორიაში, საარჩევნო ბარიერი 9 პოლიტიკურმა პარტიამ გადალახა და საქართველოს პარლამენტში შესვლის მანდატი ოპოზიციის 60-მა წარმომადგენელმა მოიტოვა. უფრო მეტიც, ჩატარებულმა არჩევნებმა დაგვანახა, რომ, ის რომ გაგვეკეთებინა, რასაც ჩვენგან ითხოვდა რადიკალური ოპოზიცია და ეს არჩევნები 2024 წლის მოდელით ჩაგვეტარებინა, პარლამენტში დღეს ქართულ ოცნებას კიდევ უფრო მეტი მანდატი ექნებოდა და ოპოზიციაში მხოლოდ ერთი პოლიტიკური პარტია გვეყოლებოდა. პროცესმა დაადასტურა, რომ 2024 წელი სრულად პროპორციულ სისტემაზე გადასვლისთვის სრულად იყო შერჩეული", — განაცხადა არჩილ თალაკვაძემ.

შეგახსენებთ, რომ პროპორციული საარჩევნო სისტემის მოთხოვნით ფართომასშტაბიანი აქციები მოძრაობა #სირცხვილიას ორგანიზებით მას შემდეგ დაიწყო, რაც საქართველოში რუსი დეპუტატი, სერგეი გავრილოვი ჩამოვიდა და მართლმადიდებლობის საპარლამენტო ასამბლეის სესიის წასაყვანად, საქართველოს პარლამენტის თავმჯდომარის სავარძელი დაიკავა. პროტესტის მეხუთე დღეს მმართველ გუნდს დათმობაზე მოუწია წასვლა. პარტიის ლიდერმა, ბიძინა ივანიშვილმა საზოგადოებას ამცნო, რომ 2020 წელს არჩევნებს პროპორციული სისტემითა და ნულოვანი ბარიერით ჩაატარებდნენ.

ამის შემდეგ, ქართულმა ოცნებამ მოამზადა კანონპროექტი, რომელიც 2020 წლისთვის არჩევნების ნულოვანი ბარიერით ჩატარებას გულისხმობდა. თუმცა, ქართულმა ოცნებამ თავისივე ინიცირებული კანონპროექტი ჩააგდო. პროექტის ინიციატორი 93 დეპუტატიდან, 35-მა პოზიცია შეიცვალა. საზოგადოებამ მათ "ამბოხებული დეპუტატები" შეარქვა.

კანონპროექტის ჩაგდების შემდეგ, გასული წლის ნოემბერში აქციები გაგრძელდა. რამდენიმე კვირიანი პროტესტის შემდეგ, ოპოზიციასა და მმართველ გუნდს შორის დიპლომატების მედიატორობით მოლაპარაკებები დაიწყო, რომელიც, საბოლოოდ, 2020 წლის 8 მარტის შეთანხმებით დასრულდა. შეთანხმების მიხედვით, 2020 წლის საპარლამენტო არჩევნები 120/30-ზე მანდატების თანაფარდობით ჩატარდა, ხოლო მომდევნო არჩევნები სრულად პრპორციული სისტემით უნდა ჩატარდეს.