OVD-Info-ს თანახმად, რუსი ოპოზიციონერის, ალექსეი ნავალნის მხარდასაჭერ აქციაზე დღეს, 31 იანვარს 4 000-ზე მეტი მომიტინგე დააკავეს. მათ შორის 1 516 ადამიანი მოსკოვში. აქციაზე დააკავეს ნავალნის ცოლი, იულია ნავალნაიაც.

რუსეთში ნავალნისა და სხვა პოლიტპატიმრების მხარდასაჭერად საპროტესტო აქციები დღეს განახლდა. Deutsche Welle-ს ინფორმაციით, ძალოვანი უწყებების წარმომადგენლები მომიტინგეებს ფიზიკურად უსწორდებოდნენ. მედიის ინფორმაციით, განსაკუთრებული სიმკაცრით გამოირჩეოდნენ ძალოვნები ჟურნალისტების მიმართაც.

რუსეთში განვითარებულ მოვლენებს გამოეხმაურა ამერიკის შეერთებული შტატების ახლადარჩეული სახელმწიფო მდივანი, ენტონი ბლინკენი. მან მშვიდობიანი მომიტინგეების მიმართ მკაცრი ზომების გამოყენება დაგმო და კრემლს ნავალნისა და სხვა დაკავებულების გათავისუფლებისკენ მოუწოდა.

გერმანიიდან რუსეთში დაბრუნებული ალექსეი ნავალნი აეროპორტში 17 იანვარს დააკავეს. მას პირობითი მსჯავრის დარღვევას ედავებიან. რუს ოპოზიციონერს 30-დღიანი პატიმრობა შეუფარდეს.

ნავალნის დაკავების გამო რუსეთის რამდენიმე ქალაქში 23 იანვარს საპროტესტო აქციები გაიმართა. ყველაზე მასშტაბური იყო მოსკოვსა და სანქტ-პეტერბურგში. არასანქცირებულ აქციაზე გასული დემონსტრანტები პოლიციამ ძალის გამოყენებით დაშალა და მათ წინააღმდეგ ხელკეტებს იყენებდა. სამი ათასამდე პირი კი დააკავეს.