ამერიკის შეერთებული შტატები რუსეთის ხელისუფლების მიერ მშვიდობიანი მომიტინგეებისა და ჟურნალისტების მიმართ მკაცრი ზომების გამოყენებას გმობს. აშშ-ს სახელმწიფო მდივანი, ენტონი ბლინკენი კრემლს რუსი ოპოზიციონერის, ალექსეი ნავალნისა და სხვა დაკავებულების გათავისუფლებისკენ მოუწოდებს.

"აშშ გმობს მკაცრი ტაქტიკის გამოყენებას რუსეთის ხელისუფლების მიერ მშვიდობიანი მომიტინგეებისა და ჟურნალისტების მიმარ. კიდევ ერთხელ მოვუწოდებთ რუსეთის ხელისუფლებას გაათავისუფლოს დაკავებულები, მათ შორის ალექსეი ნავალნი", — წერს ბლინკენი ტვიტერზე.

დღეს, 31 იანვარს რუსეთში ნავალნისა და სხვა პოლიტპატიმრების მხარდასაჭერად საპროტესტო აქციები განახლდა. Deutsche Welle-ს ინფორმაციით, ძალოვანი უწყებების წარმომადგენლები მომიტინგეებს ფიზიკურად უსწორდებიან. მედიის ინფორმაციით, განსაკუთრებული სიმკაცრით გამოირჩევიან ძალოვნები ჟურნალისტების მიმართაც.

OVD-Info-ს თანახმად, ამ დროისათვის მოსკოვში 300-ზე მეტი მომიტინგეა დაკავებული. ქვეყნის მასშტაბით კი, დაკავებული მოქალაქეების რიცხვმა 1 800-ს გადააჭარბა.

სამართალდამცველებმა მოსკოვში მიმდინარე აქციის დროს რუსი ოპოზიციონერის, ალექსეი ნავალნის ცოლი, იულია ნავალნაიაც დააკავეს.

გერმანიიდან რუსეთში დაბრუნებული ალექსეი ნავალნი აეროპორტში 17 იანვარს დააკავეს. მას პირობითი მსჯავრის დარღვევას ედავებიან. რუს ოპოზიციონერს 30-დღიანი პატიმრობა შეუფარდეს.

ნავალნის დაკავების გამო რუსეთის რამდენიმე ქალაქში 23 იანვარს საპროტესტო აქციები გაიმართა. ყველაზე მასშტაბური იყო მოსკოვსა და სანქტ-პეტერბურგში. არასანქცირებულ აქციაზე გასული დემონსტრანტები პოლიციამ ძალის გამოყენებით დაშალა და მათ წინააღმდეგ ხელკეტებს იყენებდა. სამი ათასამდე პირი კი დააკავეს.