სწრაფი გადახდის აპარატებით განხორციელებული გადახდების დროს გადამხდელის სავალდებულო იდენტიფიკაციის მოთხოვნა ამოქმედდა. ეს იმას ნიშნავს, რომ ანგარიშზე თანხის შეტანის, გატანის ან სხვა ტრანზქციის დროს აპარატი ტელეფონითა და პირადი ნომრით იდენტიფიკაციას მოგთხოვთ.

საქართველოს ეროვნულ ბანკში On.ge-ს განუცხადეს, რომ აღნიშნული გადაწყვეტილება 2019 წელს მიღებული ფულის გათეთრებისა და ტერორიზმის დაფინანსების აღკვეთის ხელშეწყობის შესახებ საქართველოს ახალი კანონის მოთხოვნებით არის განპირობებული, რომელიც თავის მხრივ ევროდირექტივითა და FATF-ის 40 რეკომენდაციით გათვალისწინებულ საერთაშორისო სტანდარტებს ემყარება.

"აღნიშნულის შესახებ საფინანსო სექტორის შესაბამისი წარმომადგენლები სრულად იყვნენ ინფორმირებულნი. მათ გარკვეული ვადა ჰქონდათ იმისთვის, რომ მოეხდინათ მომხმარებლების ინფორმირება ახალი რეგულაციის 2021 წლიდან ამოქმედების შესახებ და ამასთანავე, ამ მიმართულებით საინფორმაციო კამპანია ეწარმოებინათ", — განაცხადეს ეროვნულ ბანკში.

მათივე ინფორმაციით, იდენტიფიკაცია, მიუხედავად თანხის ოდენობისა, საერთოდ არ მოითხოვება აპარატით განხორციელებულ შემდეგ გადახდებზე:

  • კომუნალური გადახდები (დენი, წყალი, გაზი, დასუფთავება, ინტერნეტი და ტელეკომუნიკაცია, მობილური ოპერატორები);
  • სახელმწიფო ხაზინაში შემავალი გადახდები;
  • სახელმწიფო საპენსიო ფონდში გადახდები;
  • სამოქალაქო ტრანსპორტი (მუნიციპალური ტრანსპორტი, ტაქსი, რკინიგზის ბილეთები, ავტობუსის ბილეთები;
  • საფოსტო მომსახურება;
  • განათლება (უმაღლესი სასწავლებლები, სკოლა, ბაგა-ბაღი, საბავშვო წრეები);
  • სპორტული გამაჯანსაღებელი წრეები;
  • მედია/პრესა (გაზეთების და ჟურნალები) გამოწერა;
  • საყოფაცხოვრებო მომსახურება (ლიფტები, დასუფთავება, დაცვა, მცირეთანხიანი სარემონტო სამუშაოები);
  • ჯანდაცვა (სამედიცინო მომსახურების საფასური) და ვეტერინარია (გარდა მედიკამენტებით ვაჭრობისა);
  • სავიზო მომსახურების საფასური;
  • გარკვეული ტიპის დაზღვევა, რომელიც იდენტიფიკაციის მოთხოვნებისგან კანონმდებლობით გათავისუფლებულია;
  • დაბალრისკიანი საქონლის შეძენა.

ეროვნული ბანკის ცნობით, სწრაფი გადახდის აპარატებით განხორციელებულ ნებისმიერი სხვა ტიპის გადახდებზე ნულოვანი იდენტიფიკაციის ვალდებულება მოქმედებს.

"შესაბამისად, ეს მოთხოვნა მხოლოდ იმ ტიპის გადახდებზეა დაწესებული, რომელიც შედარებით მომეტებული ML/FT რისკების მატარებელია და საჭიროა მათი სრულყოფილი მონიტორინგი ფულის გათეთრების და ტერორიზმის დაფინანსების რისკების შემცირებისკენ", — აცხადებენ საფინანსო დაწესებულებაში. მათივე თქმით, ახალი წესი 2021 წლის 15 იანვრიდან ამოქმედდა.