ახალი წლის ღამეს დიდმა ბრიტანეთმა ევროკავშირი საბოლოოდ დატოვა. გარდამავალი პერიოდი დასრულდა, ხოლო ბრიუსელსა და ლონდონს შორის ეკონომიკის, მიგრაციისა და მოგზაურობის სფეროებში ახალი წესები ამოქმედდა.

პრემიერმინისტრის, ბორის ჯონსონის განცხადებით, დიდმა ბრიტანეთმა თავისუფლება დაიბრუნა. მის პოზიციას არ იზიარებს შოტლანდიის პირველი მინისტრი ნიკოლა სტარჯონი, რომელიც ევროკავშირის წევრობის მომხრეა.

"შოტლანდია მალე დაბრუნდება, ევროპა", — დაწერა მან ტვიტერზე.

როგორც BBC წერს, პირველმა სატვირთო მანქანამ დიდი ბრიტანეთი-ევროკავშირის საზღვარი შეფერხების გარეშე გადაკვეთა. თუმცა რამდენიმე სატვირთომ საზღვრის გადაკვეთა შესაბამისი დოკუმენტების არქონის გამო ვერ შეძლო.

2016 წლის რეფერენდუმის შემდეგ დიდმა ბრიტანეთმა ევროკავშირი ოფიციალურად 2020 წლის 31 იანვარს დატოვა. თუმცა მომდევნო 11 თვის განმავლობაში იყო გარდამავალი პერიოდი, რა დროსაც სამომავლო ეკონომიკური ურთიერთობები განიხილებოდა. შეთანხმება საბოლოოდ 24 დეკემბერს შედგა.

ახალი წესების თანახმად, ბრიტანელ მწარმოებლებს კვლავ შეუძლიათ დამატებით გადასახადების გარეშე წვდომა ქონდეთ ევროპულ ბაზარზე, თუმცა ამისთვის მათ საბაჟო დოკუმენტების წარდგენა მოუწევთ. გარდა ამისა, ბრიტანეთმა მოილაპარაკა ესპანეთთანაც, რომ გიბრალტარის საზღვარი ღია დარჩებოდა. დღეიდან ევროკავშირსა და დიდ ბრიტანეთს შორის მოქალაქეების თავისუფალი გადაადგილება შეწყდა. შენგენის ზონაში ხანგრძლივი ყოფნისთვის ბრიტანეთის ნებისმიერ მოქალაქეს ვიზა დასჭირდება.