2025 წლის ევროვიზიის სიმღერის კონკურსზე საქართველო ფინალს მიღმა დარჩა. წლევანდელ ევროფესტივალზე ჩვენი ქვეყანა მარიამ შენგელიამ წარადგინა, საკონკურსო სიმღერით Freedom ("თავისუფლება"), მაგრამ მეორე ნახევარფინალური ტურის საუკეთესო ათეულში მოხვედრა ვერ შეძლო.

პირველმა არხმა, რომელიც ევროვიზიის ორგანიზატორი ევროპის მაუწყებელთა კავშირის წევრია და ევროფესტივალისთვის კონკურსანტის შერჩევაზეა პასუხისმგებელი, მარიამ შენგელია დამოუკიდებლად, შიდაშესარჩევი კონკურსის გარეშე დაასახელა საქართველოს წარმომადგენლად. შენგელიას საკონკურსო კომპოზიცია ქეთი გაბისიანმა და ბუკა კარტოზიამ დაწერეს. საზმაუს მტკიცებით, სიმღერა "საერთაშორისო კონკურსზე ზუსტად წარმოაჩენდა ჩვენი ქვეყნის კულტურულ იდენტობას".

აღსანიშნავია, რომ ევროვიზიაზე საქართველოს წარდგენის სურვილი წელს გამოთქვა Nini Iris-მაც და პირველ არხს საკუთარი სიმღერა გაუგზავნა. ნინი, რომელიც ამერიკული ვოისის ნახევარფინალისტი იყო, ევროვიზიის ქართველი გულშემატკივრების ერთ-ერთ მთავარ ფავორიტად მოიაზრებოდა.

რაც შეეხება მარიამ შენგელიას, წინათ საქართველოს ვარსკვლავისა და ვოისის მონაწილემ, გასულ წელს საზოგადოებას თავი წინასაარჩევნოდ ქართული ოცნების მხარდასაჭერ კონცერტებზე გამოსვლით დაამახსოვრა. ქართული ოცნების აქტიური მხარდამჭერია ევროვიზიის შარშანდელი მონაწილე ნუცა ბუზალაძეც, რომელიც წლევანდელ კონკურსზე საქართველოს ჟიურის ქულებს გამოაცხადებს.

რიგით 69-ე ევროვიზიას შვეიცარიის ქალაქი ბაზელი მასპინძლობს. კონკურსის ფინალი 17 მაისს გაიმართება.

ასევე იხილეთ:

თუ მუსიკა შენი ცხოვრების განუყოფელი ნაწილია და ამ თემაზე მეტის გაგება გინდა, შემოგვიერთდი ჯგუფში ერთი სიმღერაც და...