რესპუბლიკური პარტიის თავმჯდომარის, ხათუნა სამნიძის თქმით, როდესაც ხელისუფლება იტაცებს ძალაუფლებას, ლოგიკურია, რომ მთავრდება მოქალაქეებზე ზრუნვა და იწყება კუნთების ჩვენების პოლიტიკა. ასე გამოეხმაურა ფორმულასთან ეთერში სამნიძემ გუშინ, აფრიკის დასახლებაში განვითარებულ მოვლენებს.

"როდესაც ხელისუფლება იწყებს ძალაუფლების მიტაცებას, როდესაც ის თვლის, რომ მას აბსოლუტური ძალაუფლება აქვს და დღეს ამ მდგომარეობაშია ქართული ოცნება, როდესაც იმისაც კი არ ითვალისწინებს, რომ შეიძლება სრულიად მარტო დარჩეს, უკვე სამართლებრივადაც, პარლამენტში და ქვეყანას ჰყავდეს ერთპარტიული პარლამენტი, ლოგიკური გაგრძელებაა ის, რომ მოქალაქეებზე ზრუნვა მთავრდება და კუნთების ჩვენებით ცდილობს ხელისუფლება თავისი ძალაუფლების გამყარებას. გუშინ ეს ფაქტები ვნახეთ და ეს ჩანდა", — აცხადებს სამნიძე.

იგი ასევე გამოეხმაურა კახა კალაძის გადაწყვეტილებას, ერთი კონკრეტული ოჯახისთვის ბინის ჩუქების შესახებ.

"ძალიან უტიფრად ამბობდა კახა კალაძე, რომ ამ ადამიანებმა მიიტაცეს ეს მიწები, ეს არის უკანონო მშენებლობები და ჩვენ ამას აღვკეთთ. მალე მოუწია მას სხვა ტიპის გადაწყვეტილების მიღება, რაც კიდევ უფრო უარესი სანახავია, როდესაც ვხედავთ რომ ერთი ადამიანის კეთილ ნებაზეა დამოკიდებული ჩვენი მოქალაქეების ცხოვრება და ელემენტარული პირობები და არა სისტემა უზრუნველყოფდეს ამას", — განაცხადა ხათუნა სამნიძემ.

15 დეკემბერს თბილისის მერიამ სამგორის რაიონში, აფრიკის დასახლებაში უკანონო შენობების დემონტაჟი დაიწყო. მათი ინფორმაციით, სახელმწიფოს საკუთრებაში არსებულ მიწის ნაკვეთზე, სამშენებლო სამართალდარღვევის 12 ფაქტი გამოვლინდა. ტერიტორიაზე სპეციალური ტექნიკის შეყვანას მოსახლეობის პროტესტი მოჰყვა, ადგილზე რამდენიმე საათის განმავლობაში მობილიზებული იყო პოლიციაც. იყო პოლიციასა და მოქალაქეებს შორის დაპირისპირების რამდენიმე შემთხვევა. შსს-ს ინფორმაციით, დაკავებულია 8 ადამიანი.

აფრიკის დასახლებაში მიმდინარე პროცესებზე საუბრისას, თბილისის მერმა, კახა კალაძემ განაცხადა, რომ იქ გამოსულ მოსახლეობას აქვს სახლები და მიწები და ისინი მიზანმიმართულად ცდილობენ მიწების დატაცებს. პასუხად ადგილობრივებმა განაცხადეს, რომ ეს მათი დაცინვაა, რადგან ისინი უკიდურეს გაჭირვებაში ცხოვრობენ.

On.ge-სთან საუბრისას რამდენიმე ადგილობრივმა აღნიშნა, რომ ისინი მრავალშვილიანები არიან და ამ სახლებს წლების განმავლობაში შეგროვებული ფულით იშენებდნენ. მათი თქმით, ხშირად შვილების გამოსაკვები ფულიც არ აქვთ.

გაიგეთ მეტი: