საქართველოს მე-5 პრეზიდენტი სალომე ზურაბიშვილი დღეს ჩეხეთის რესპუბლიკას ეწვევა. დაგეგმილია შეხვედრები უმაღლესი პოლიტიკური თანამდებობის პირებთან. ინფორმაციას სალომე ზურაბიშვილის ადმინისტრაცია ავრცელებს.

პრეზიდენტი 9 აპრილს ჩეხეთის სენატს სიტყვით მიმართავს. სიტყვით გამოსვლის შემდეგ კი დაგეგმილია პრეზიდენტის შეხვედრები სენატის პრეზიდენტსა და სენატის წევრებთან.

პრაღაში სალომე ზურაბიშვილი ვაცლავ ჰაველის ბიბლიოთეკას ეწვევა, სადაც რამდენიმე შეხვედრა გაიმართება, როგორც ბიბლიოთეკის დირექტორსა და მისი გუნდის წევრებთან, ასევე არასამთავრობო ორგანიზაციების, ჟურნალისტებისა და კვლევითი ცენტრების წარმომადგენლებთან. ანალიტიკოსებთან შეხვედრას, რომელიც კითხვა-პასუხის რეჟიმში წარიმართება, მოდერაციას გაუწევს ბიბლიოთეკის დირექტორი ტომაშ სედლაჩეკი.

დაგეგმილია პრეზიდენტის ინტერვიუები საერთაშორისო მედიასთან.