ნაციონალური მოძრაობის ერთ-ერთი ლიდერი, ლევან ხაბეიშვილი ამბობს, რომ კარგია ერთ ბავშვს რომ ჩუქნის კახა კალაძე ბინას, მაგრამ, აინტერესებს, რა ეშველებათ იმ ბავშვებს, რომელთა ფოტოები მედიით არ გავრცელებულა.

"ვისი ფოტოც არ გვაქვს, ამ ბავშვებს რა ეშველებათ? ანუ, ამბობს, რომ ამ ბავშვს სახლს ვუყიდიო და მეორე მხრივ, როგორც მერი, გველაპარაკება, რომ მე გავაგრძელებ ამ უკანონო სახლების დანგრევას და დემონტაჟსო. ამ ერთ ბავშვს, ძალიან კარგია რომ სახლი ექნება, ოღონდ სხვა ბავშვებს, ვისი საქმეც საპიაროდ არ გამოდგება, იმათ ოჯახებში ისევ შევარდება დედაქალაქის მერი?", — განაცხადა ხაბეიშვილმა ფორმულას ეთერში.

მას დედაქალაქის მერის გულწრფელობაში ეჭვი ეპარება და ამბობს, რომ კალაძე ორივე შემთხვევაში — დემონტაჟისა და ბინის ჩუქების შესახებ გადაწყვეტილების მიღებისას — გულწრფელი ვერ იქნება.

"მე მართლა მაინტერესებს, გულწრფელად, კალაძეს ამდენი სახე როგორ აქვს და ყველგან გულწრფელი როგორ არის. ე.ი. არ იცოდა რომ იქ ბავშვები იყვენ და ორსული ქალები? ინფორმაცია არ ჰქონდა? ტყუილია რა", — განაცხადა ხაბეიშვილმა.

15 დეკემბერს თბილისის მერიამ სამგორის რაიონში, აფრიკის დასახლებაში უკანონო შენობების დემონტაჟი დაიწყო. მათი ინფორმაციით, სახელმწიფოს საკუთრებაში არსებულ მიწის ნაკვეთზე, სამშენებლო სამართალდარღვევის 12 ფაქტი გამოვლინდა. ტერიტორიაზე სპეციალური ტექნიკის შეყვანას მოსახლეობის პროტესტი მოჰყვა, ადგილზე რამდენიმე საათის განმავლობაში მობილიზებული იყო პოლიციაც. იყო პოლიციასა და მოქალაქეებს შორის დაპირისპირების რამდენიმე შემთხვევა. შსს-ს ინფორმაციით, დაკავებულია 8 ადამიანი.

აფრიკის დასახლებაში მიმდინარე პროცესებზე საუბრისას, თბილისის მერმა, კახა კალაძემ განაცხადა, რომ იქ გამოსულ მოსახლეობას აქვს სახლები და მიწები და ისინი მიზანმიმართულად ცდილობენ მიწების დატაცებს. პასუხად ადგილობრივებმა განაცხადეს, რომ ეს მათი დაცინვაა, რადგან ისინი უკიდურეს გაჭირვებაში ცხოვრობენ.

On.ge-სთან საუბრისას რამდენიმე ადგილობრივმა აღნიშნა, რომ ისინი მრავალშვილიანები არიან და ამ სახლებს წლების განმავლობაში შეგროვებული ფულით იშენებდნენ. მათი თქმით, ხშირად შვილების გამოსაკვები ფულიც არ აქვთ.

გაიგეთ მეტი: