ჯანდაცვის მინისტრის მოადგილის, თამარ გაბუნიას განცხადებით, ის ადამიანები, ვისაც ანტიგენის ტესტით კორონავირუსი დაუდასტურდებათ, უნდა დარჩნენ ბინაზე და დაელოდონ ოჯახის ექიმის ზარს, ან თავად დაურეკონ მას. გაბუნიას თქმით, ანტიგენის ტესტზე დადებითი პასუხის მიღების შემდეგ ადამიანები 112-ში რეკავენ, რაც არასწორია. ჯანდაცვის მინისტრის მოადგილე ამბობს, რომ 112-ში მხოლოდ იმ შემთხვევაში ვრეკავთ, თუ პაციენტის მდგომარეობა მძიმეა.

"დადასტურებული პირები უნდა დარჩნენ ბინაზე. მათ დაუკავშირდებათ ოჯახის ექიმი, ისევე, როგორც ეს ხდება სხვა შემთხვევაში. სწრაფად იგებს პასუხს პაციენტი და ხშირ შემთხვევაში უჩნდება იქვე შეკითხვა, რომ როგორ უნდა მოიქცეს და გუშინ ძალიან ბევრი ზარი განხორციელდა 112-ში. 112-ში, ამ შემთხვევაში, არ არის საჭირო დარეკვა. ოჯახის ექიმთან არის მნიშვნელოვანი კომუნიკაცია. ოჯახის ექიმს პაციენტმა შეუძლია თვითონ დაურეკოს. ეს პასუხი ოჯახის ექიმისთვისაც ცნობილია და ასევე, დაელოდოს ოჯახის ექიმისგან ზარს, დღის განმავლობაში აუცილებლად დაუკავშირდებიან იმისთვის, რომ მისცენ შესაბამისი მითითება. 112-ს მხოლოდ ვურეკავთ იმ შემთხვევაში, თუ მდგომარეობა არის მძიმე, გართულებული და პაციენტი თვლის, რომ სჭირდება გადაუდებელი დახმარების ჩართვა", — განაცხადა თამარ გაბუნიამ.

მისი თქმით, კლინიკებში მკურნალობას აგრძელებენ მძიმე და კრიტიკული პაციენტები. გაბუნიას ინფორმაციით, ინტენსიური თერაპიის პროცესში 1000-ზე მეტი პაციენტია.

"რა თქმა უნდა, მთავარი აქცენტი არის იმაზე, რომ თუ ვინმეს სჭირდება კრიტიკული დახმარება, დროულად მოხდეს მისი გადაყვანა ჰოსპიტალში", — ამბობს გაბუნია.

გუშინ იყო გაფართოებული ტესტირების პირველი დღე. ჯანდაცვის მინისტრის მოადგილის განმარტებით, დადასტურებული 5 068 შემთხვევიდან 1400 სწორედ ანტიგენის ტესტის შედეგი იყო.

2 დეკემბერს ცნობილი გახდა, რომ მთავრობა ანტიგენზე დამყარებული სწრაფი ტესტების გამოყენებას აფართოებს და ეს ტესტი ჩაუტარდება ყველას, ვინც სტაციონარში მოხვდება, განურჩევლად იმისა, აქვს თუ არა კორონავირუსის სიმპტომები. პანდემიის დასაწყისში უწყებათაშორისი საკოორდინაციო საბჭოს წევრები ამ ტესტებს სკეპტიკურად უყურებდნენ და აცხადებდნენ, რომ მათი სანდოობა კითხვის ნიშნის ქვეშ დგას და ის PCR ტესტით უნდა გა დამოწმდეს, რაც არც დროს ზოგავს და არც რესურს. ქვეყანაში ვირუსის გავრცელების მეათე თვეზე მიდგომა შეიცვალა.

გაიგეთ მეტი: