ჯანდაცვის მინისტრის მოადგილე, თამარ გაბუნია განმარტავს, რომ ანტიგენის ტესტს მაღალი მგრძნობელობა და სარწმუნო შედეგი სიმპტომების გამოვლენის შემდეგ აქვს, ამიტომ უსიმპტომო პირებისთვის მისი ჩატარება რეკომენდირებული არ არის.

"წინასწარ ისიც ვიცით რა მახასიათებლები აქვს ტესტს, ამიტომ ტესტი ყველაზე მგრნობიარე და სარწმუნო არის სიმპტომიან პირებში. როდესაც ადამიანს სიმპტომი არ აქვს და ინტერესის გამო სურს სწრაფი ანტიგენ ტესტის ჩატარება, რა თქმა უნდა, არ არის ინფორმატიული და ამას არცერთ შემთხვევაში არ ვურჩევთ", — განაცხადა გაბუნიამ.

მისი თქმით, ანტიგენის ტესტი ქვეყანაში დაახლოებით 300-მდე დაწესებულებაში ჩატარდება და აქცენტი იქნება დიდ ქალაქებზე: თბილისი, ქუთაისი, ბათუმი, რუსთავი, ფოთი.

გაბუნიან განმარტა, რა წესები უნდა იყოს დაცული ანტიგენის ტესტის ჩატარებისას.

"ამ შემთხვევაში კლინიკებში ერთადერთ მოთხოვნა რომელიც დგება ანტიგენ ტესტზე, ეს არის ინფექციის კონტროლის პირობების დაცვა, რიგის მოწესრიგება, ნაკადების გამიჯვნა, რომ სიცხიანი პაციენტი არ შეხვდეს სხვა პაციენტებს და ასევე, რა თქმა უნდა, ექიმების და ექთნების მიერ პირადი დაცვის საშუალების გამოყენება. სულ ეს არის.

ანტიგენისთვის განსაკუთრებული მოთხოვნები საჭირო არ არის, რა თქმა უნდა. ანტიგენის მთავარი ხარისხის კონტროლის პირობა არის ის, რომ ჯანმრთელობის მსოფლიო ორგანიზაციის მიერ იყოს პრეკვალიფიცირებულია და ესეთ არის ის ტესტი, რომელსაც ჩვენ ვიყენებთ ქვეყანაში. ძალიან მაღალი ხარისხისაა და იძლევა იმის გარანტიას, რომ ცდომილება იყოს ძალიან დაბალი", — განაცხადა მან.

მანვე აღნიშნა, რომ საქართველოში შემოტანილია ჯანმრთელობის მსოფლიო ორგანიზაციის მიერ პრეკვალიფიცირებული ორი ტესტიდან ერთ-ერთი და ის მაღალი ხარისხისაა.

2 დეკემბერს ცნობილი გახდა, რომ მთავრობა ანტიგენზე დამყარებული სწრაფი ტესტების გამოყენებას აფართოებს და ეს ტესტი ჩაუტარდება ყველას, ვინც სტაციონარში მოხვდება, განურჩევლად იმისა, აქვს თუ არა კორონავირუსის სიმპტომები. პანდემიის დასაწყისში უწყებათაშორისი საკოორდინაციო საბჭოს წევრები ამ ტესტებს სკეპტიკურად უყურებდნენ და აცხადებდნენ, რომ მათი სანდოობა კითხვის ნიშნის ქვეშ დგას და ის PCR ტესტით უნდა გადამოწმდეს, რაც არც დროს ზოგავს და არც რესურს. ქვეყანაში ვირუსის გავრცელების მეათე თვეზე მიდგომა შეიცვალა.

დაავადებათა კონტროლის ცენტრის დირექტორმა, ამირან გამყრელიძემ განმარტა, რომ ანტიგენზე დამყარებული ტესტის შედეგის აღიარებისა და გადამოწმების მეთოდი შეიცვალა და ამიერიდან ამ ტესტის პასუხი საბოლოოდ მიიჩნევა, თუ მას ექიმი არ დააყენებს ეჭვქვეშ. კერძოდ, გამყრელიძე განმარტავს, რომ ანტიგენის ტესტი PCR-ზე მხოლოდ ორ შემთხვევაში გადამოწმდება:

"ანტიგენით გამოვლენილი შემთხვევა უკვე აღარ ემოქმედება გადამოწმებას, როგორც ეს გვქონდა გაზაფხულზე და ზაფხულზე. მხოლოდ ორ შემთხვევაში შეიძლება მოხდეს გადამოწმება, ექიმის გადაწყვეტილებით. ამას ხაზს ვუსვამ, ერთი — თუ არის უსიმპტომო ადამიანი, ანტიგენი კი არის დადებითი და ექიმი თვლის, რომ საჭიროა გადამოწმება. მეორე — თუ არის სიმპტომები გამოხატული და ანტიგენი არის უარყოფითი, ისევ ექიმის დანიშნულებით გადამოწმდება.

მაგრამ თუ არის სიმპტომიანი ადამიანი და ანტიგენი დადებითია, მას არავითარი გადამოწმება არ სჭირდება. ის ადამიანი მოქმედებს უკვე იმ პროტოკოლით, როგორც ოქროს სტანდარტით, ანუ PCR-ით დადასტურებულზე".

საბჭოში განმარტავენ, რომ გაფართოებული ტესტირების მიზანია არსებული ორთვიანი შეზღუდვებისას მაქსიმალურად ბევრი შემთხვევის გამოვლენა და დროული იზოლირება მოყვეს. ამიტომ, გაფართოებული ტესტირება, შეზღუდვების მსგავსად, პირველ თებერვლამდეა დაგეგმილი.