დაავადებათა კონტროლის ცენტრის ცხელი ხაზი 116 001
ჯანდაცვის სამინისტროს ცხელი ხაზი 15 05
მთავრობის ცხელი ხაზი 144

დაავადებათა კონტროლის ცენტრის დირექტორის, ამირან გამყრელიძის განცხადებით, სავარაუდო რეინფიცირების რამდენიმე შემთხვევის კვლევა მიმდინარეობს, თუმცა ჯერჯერობით დადასტურებული არაა.

"მიმდინარეობს კვლევა რამდენიმე სავარაუდო შემთხვევის, ამგრამ დადასტურებული ინფორმაცია, რომ ნამდვილად რეინფექცია გვქონდა საქართველოში, ჩვენ არ გვაქვს. გვაქვს, კიდევ ერთხელ ხაზს ვუსვამ, რამდენიმე სავარაუდო შემთხვევა, სადაც მიმდინარეობს ჩაღრმავებული კვლევა, ანუ განმეორებითი PCR ტექნოლოგიებით კვლევა და ამავე დროს მიმდინარეობს ე.წ. გენომის ამ ადამიანების სეკვენირება, რომელიც დროს და შესაბამის მაღალ ტექნოლოგიებს საჭიროებს, რომლის საშუალებაც აქვს მხოლოდ ლუგარის ცენტრს ქვეყანაში. ამიტომ, რომ დავადასტუროთ, რომ ნამდვილად იყო თუ არა რეინფიცირება, ამას სჭირდება კარგად განხილვა პროფესიულ საბჭოზე და შემდეგ გადაწყვეტილება ყველა იმ ლაბორატორიული თუ სხვა კლინიკური არგუმენტის მიხედვით, რომელიც არის. გიდასტურებთ, რომ რამდენიმე შემთხვევაზე მიმდინარეობს კვლევა, მაგრამ დადასტურებული არ გვაქვს ჯერჯერობით", — განაცხადა გამყრელიძემ.

4 დეკემბრის მონაცემებით, ბოლო 24 საათის განმავლობაში კორონავირუსის 5 068 ახალი შემთხვევა დადასტურდა. გამოჯანმრთელდა — 2 336, ხოლო გარდაიცვალა 38 ადამიანი.

ქვეყანაში პანდემიის გავრცელებიდან დღემდე გამოვლენილი დადასტურებული შემთხვევების საერთო რაოდენობა შეადგენს 152 704-ს, ხოლო ჯამში გამოჯანმრთელებულთა რაოდენობა გაიზარდა 126 904-მდე. 2020 წლის 26 თებერვლიდან დღემდე სულ გვაქვს 1 425 გარდაცვალების შემთხვევა.

დღეს გამოვლენილი ინფიცირების 5 068 ახალი შემთხვევიდან, დედაქალაქისა და რეგიონების მიხედვით მაჩვენებლები გამოიყურება შემდეგი სახით:

  • თბილისში — 1 959;
  • აჭარაში — 483;
  • იმერეთში— 980;
  • ქვემო ქართლში — 296;
  • შიდა ქართლში — 222;
  • გურიაში — 122;
  • სამეგრელო-ზემო სვანეთში — 408;
  • კახეთში — 335;
  • მცხეთა-მთიანეთში — 130;
  • სამცხე-ჯავახეთში — 114;
  • რაჭა-ლეჩხუმსა და ქვემო სვანეთში — 19.

ამ ეტაპზე ინფიცირების მიმდინარე აქტიური შემთხვევა არის 24 349. მძიმე პაციენტია 1 070 პირი, მათ შორის, თბილისში — 491, აჭარაში — 155, იმერეთში — 247. ხელოვნური სუნთქვის აპარატზე იმყოფება 476 პირი, მათგან, თბილისში 214, აჭარაში — 117, იმერეთში — 45.

3 899 ადამიანი მოთავსებულია კოვიდ-სასტუმროში, 13 779 პირი ვირუსის მკურნალობის კურსს გადის საცხოვრებელ ბინაზე. საკარანტინე სივრცეებში კი მოთავსებულია 1 241 ადამიანი. ამ ეტაპისთვის თვითიზოლაციაში იმყოფება 51 262 ადამიანი.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: