სატელეფონო მიყურადებასთან დაკავშირებით, შუამდგომლობებისა და მათი დაკმაყოფილების სტატისტიკა 2011 წლიდან მცირდება, თუმცა, საზოგადოებრივი აზრი მიყურადებასთან დაკავშირებით 2013 წლის შემდეგ კარდინალურად არ შეცვლილა. ამის შესახებ საუბარია ინფორმაციის თავსუფლების განვითარების ინსტიტუტის კვლევაში.

2011 წელს მხოლოდ პროკურატურის მიერ სასამართლოებმა 7 195 შუამდგომლობა მიიღეს, საიდანაც 99%-ზე მეტი დაკმაყოფილდა. 2015 წელს კი, ყველა საგამოძიებო უწყების მიერ მოსმენებთან დაკავშირებით სასამართლოსთვის წარდგენილი შუამდგომლობების რაოდენობა 373 იყო.

IDFI-ს მონაცემებით, 2011-2012 წლებში სასამართლოების მიერ დაკმაყოფილდა წარდგენილი შუამდგომლობების თითქმის 100 პროცენტი, ხოლო უკანასკნელი 2014 -2016 წლებში სასამართლო აკმაყოფილებს - დაყენებული შუამდგომლობების 84 პროცენტს, ან ნაკლებს.

2016 წლის პირველი 9 თვის მონაცემებით, სასამართლოებმა სატელეფონო მიყურადების ვადის გაგრძელების შესახებ 150 შუამდგომლობა განიხილეს, საიდანაც სრულად 137 დაკმაყოფილდა (95%) და ნაწილობრივ კი - 5. ეს მონაცემი არასრულია და მხოლოდ 2016 წლის იანვარი-სექტემბრის მონაცემებს მოიცავს.

„საკონსტიტუციო სასამართლოს 2016 წლის აპრილის გადაწყვეტილებამ ცხადყო, რომ სახელმწიფო უსაფრთხოების სამსახურს გააჩნია ტექნიკური შესაძლებლობა სასამართლოსა და პერსონალური მონაცემების დაცვის ინსპექტორის გვერდის ავლით, განახორციელოს ფარული მიყურადება. შესაბამისად, შესაძლოა პროაქტიულად გამოქვეყნებული მონაცემები, სრულად ვერ ასახავდეს ფარულ მიყურადებასთან დაკავშირებულ რეალურ მდგომარეობას,” - აღნიშნულია IDFI-ს კვლევაში.