ვასილ ივანოვ-ჩიქოვანი და ნინო ზაუტაშვილი საზოგადოებრივი მაუწყებლიდან გაათავისუფლეს. ჟურნალისტებმა განაცხადეს, რომ საზოგადოებრივი მაუწყებლის დირექტორმა, თინათინ ბერძენიშვილმა დღეს ისინი დაიბარა და სამსახურიდან გათავისუფლების შესახებ აცნობა. ზაუტაშვილმა ასევე დასძინა, რომ ამ ფაქტთან დაკავშირებით სასამართლოს მიმართავს.

"40 წელი ვიმუშავე საზოგადოებრივ მაუწყებელში. ზუსტად 2 წუთის წინ საზოგადოებრივი მაუწყებლის დირექტორმა, თინათინ ბერძენიშვილმა, ელენე მიხაილოვმა და თამარ შუბლაძემ მითხრეს, რომ ჩვენი თანამშრომლობის რესურსი ამოიწურა და, სამწუხაროდ, უნდა გაგიშვათო. რა თქმა უნდა, ეს საქმე წავა სასამართლოში”,— განაცხადა გადაცემა "რეალური სივრცის" წამყვანმა, ნინო ზაუტაშვილმა.

"დღეს, დირექტორთა საბჭომ იმსჯელა და მიიღო გადაწყვეტილება, რომ მე გავეთავისუფლებინე სამსახურიდან. ეს გადაწყვეტილება რამდენიმე წუთის წინ გამაცნო თინათინ ბერძენიშვილმა. ეს იყო სიტყვიერი შეხვედრა და ამ გადაწყვეტილების ოფიციალური ნაწილი უშუალოდ იურისტისგან და ადამიანური რესურსებისგან მე უნდა ჩამბარდეს," — განაცხადა ვასილ ივანოვ-ჩიქოვანმა.

შეგახსენებთ, 4 თებერვლიდან ვასილ ივანოვ-ჩიქოვანი "მოამბის" 6-საათიანი გამოშვების წამყვანი აღარ არის. მისი თქმით, მენეჯმენტმა აცნობა, რომ 4 თებერვლიდან — "არსებული გართულებული ვითარების ნორმალიზებამდე, დროებით აღარ დაევალება საინფორმაციო გამოშვება მოამბეს წამყვანის ფუნქციის შესრულების ვალდებულება".

ასევე იხილეთ: