"რეპორტიორები საზღვრებს გარეშე" (RSF) გმობს 10 აპრილს ორი ფრანგი ჟურნალისტის — კლემან ჟირარდოს და ჟერომ შობოს საქართველოში არშეშვების ფაქტს. როგორც RSF წერს, მათ ქვეყანაში შემოსვლა დაუსაბუთებლად აუკრძალეს.

განცხადებაში ნათქვამია, რომ ფოტოჟურნალისტმა ჟერომ შობომ სარჩელი შეიტანა საქართველოს საზღვარზე მისი თვითნებური გაძევების შესახებ — ანალოგიური აკრძალვის წინაშე ორი თვის წინ კლემენ ჟირარდოც აღმოჩნდა.

მათი ცნობით, მიუხედავად იმისა, რომ ის საქართველოში ათ წელზე მეტია მუშაობს, კლემან ჟირარდოს 2025 წლის 12 თებერვალს ქვეყანაში შესვლა დაუსაბუთებლად აუკრძალეს. შინაგან საქმეთა სამინისტრომ მისი სააპელაციო საჩივარი უარყო და სასამართლო სხდომა 23 ივნისსაა დაგეგმილი. საქართველოს სახალხო დამცველმა დაგმო ჟურნალისტის ფუნდამენტური უფლებების არაპროპორციული დარღვევა.

"ორი ფრანგი ჟურნალისტისთვის, რომლებიც 26 ოქტომბრის სადავო არჩევნების წინააღმდეგ გამართული საპროტესტო აქციებს აშუქებდნენ, ქვეყანაში შესვლის აკრძალვა რეპორტიორების დაშინების განზრახ სტრატეგიის ნაწილია. "რეპორტიორები საზღვრებს გარეშე" კატეგორიულად გმობს ამ შეურაცხმყოფელ გაძევებებს, მოუწოდებს მმართველ პარტიას, დაიცვას საქართველოს პრესის თავისუფლების ვალდებულებები და მოუწოდებს საფრანგეთს და ევროკავშირს, ზეწოლა მოახდინონ საქართველოს მთავრობაზე", — ნათქვმია "რეპორტიორების საზღვრებს" აღმოსავლეთ ევროპისა და ცენტრალური აზიის განყოფილების ხელმძღვანელის, ჟან კაველიეს განცხადებაში.