ჩინეთმა ვაშინგტონის მიერ ტარიფების გაზრდის საპასუხოდ ამერიკულ საქონელზე იმპორტის გადასახადი 84%-დან 125%-მდე გაზრდის შესახებ განაცხადა. ამის შესახებ Reuters წერს.

ჩინეთის სახელმწიფო საბჭოს საბაჟო ტარიფების კომისიამ განაცხადა, რომ შეერთებული შტატებიდან იმპორტირებული საქონელი მოქმედი ტარიფების პირობებში ბაზარზე ვერ დარჩება.

ჩინეთის ვაჭრობის სამინისტრომ განაცხადა, რომ მან შეერთებული შტატების წინააღმდეგ მსოფლიო სავაჭრო ორგანიზაციაში (WTO) სარჩელი შეიტანა გადასახადების გაზრდასთან დაკავშირებით. ჩინეთი დაიცავს თავის ლეგიტიმურ ინტერესებსა და უფლებებს, ასევე დაიცავს მრავალმხრივ სავაჭრო სისტემას და საერთაშორისო ეკონომიკურ წესრიგს.

2 აპრილს აშშ-ის პრეზიდენტმა დონალდ ტრამპმა აშშ-ის საგარეო სავაჭრო პარტნიორების საქონელზე სარკისებური გადასახადების შემოღების შესახებ გამოაცხადა. სიაში შეტანილი იყო სულ 185 ქვეყანა. მინიმალური საბაზისო სატარიფო განაკვეთი 10%-ია, თუმცა რიგი ქვეყნებისთვის ტარიფები ინდივიდუალურად გამოითვლება. მაშინ ჩინეთისთვის გადასახადი 34% დაწესდა, ხოლო ევროკავშირის ქვეყნებისთვის — 20%. 10%-იანი ტარიფი შეეხო საქართველოს და მის მეზობელ უკრაინას, თურქეთს, აზერბაიჯანსა და სომხეთს.

ჩინეთი იყო პირველი, ვინც რეაგირება მოახდინა აშშ-ის გადაწყვეტილებაზე ტარიფების გაზრდის შესახებ და ვაშინგტონის მიერ მსგავსი ზომების საპასუხოდ დამატებითი 34%-იანი გადასახადების შემოღება გამოაცხადა.

საპასუხოდ, თეთრი სახლის ხელმძღვანელმა განაცხადა, რომ თუ ჩინეთი 34%-იან ტარიფებს არ გააუქმებს, შეერთებული შტატები დამატებით 50%-იან ტარიფებს დააწესებს.

ჩინეთმა ტრამპის მუქარას დამატებითი ტარიფების დაწესების შესახებ უპასუხა და განაცხადა, რომ აშშ-ში იმპორტირებულ პროდუქტებზე გადასახადი 84%-მდე გაზარდა.

სავაჭრო დაპირისპირების შედეგად, აშშ-მ ჩინურ საქონელზე ტარიფები 125%-მდე გაზარდა.

ვაშინგტონის ადმინისტრაციამ სხვა ქვეყნებში დამატებითი ტარიფების შემოღება 90 დღით გადადო. ჩინეთზე ტარიფები ამოქმედდა.