გუშინ გარდაცვლილ 12 წლის მოზარდს, კორონავირუსის ინფექციასთან ერთად, სხვა ქრონიკული დაავადებებიც აღენიშნებოდა, საჭიროებდა დიალიზის ჩატარებას. ის სპეციალიზებულ კლინიკაში გადაჰყავდათ, რა დროსაც გარდაიცვალა. ამის შესახებ ინფორმაციას იაშვილის სახელობის ბათუმის დედათა და ბავშვთა ცენტრალური ჰოსპიტალის ექიმი, თამარ ბახტაძე ავრცელებს.

"გუშინ, ღამის საათებში, შემოყვანილ იქნა 12 წლის გოგონა მძიმე მდგომარეობაში. კლინიკაში ჩატარებული ტესტირების შედეგად მას დაუდასტურდა კორონავირუსული ინფექცია. მას საკუთარი ქრონიკული მძიმე დაავადებების გამო, ესაჭიროებოდა დიალიზის ჩატარება. ასევე, უნდა ითქვას, რომ დარღვეული იყო კლინიკურ-ლაბორატორიული პარამეტრები. კლინიკაში შემოსვლისას ჰქონდა სხვადასხვა სისტემის უკმარისობა. პირველადი გადაუდებელი სამედიცინო დახმარების შემდეგ გამოძახებულ იქნა კატასტროფის მედიცინის ბრიგადა და და მოხდა გადაყვანა სპეციალიზებულ კლინიკაში. სამწუხაროდ, ტრანსპორტირების განმავლობაში მისი მდგომარეობა დამძიმდა და დაფიქსირდა გარდაცვალება", — ამბობს ის.

საქართველოში 12 წლის ბავშვი კორონავირუსით გუშინ გარდაიცვალა.