პარლამენტის თავმჯდომარის, არჩილ თალაკვაძის განცხადებით, 8 ნოემბერს ცესკოსთან მიმდინარე აქციის დაშლისას იქ მყოფების დაზიანება ოპოზიციის ლიდერების ბრალია.

"თუ საქმე გინდათ, საქმე არის პარლამენტში და არა ქუჩაში. თუ წესრიგი გინდათ, წესრიგი არ არის ის, როგორც თქვენ მოიქეცით გუშინ, როდესაც საზოგადოებას უპასუხისმგებლოდ მოექეცით და შემდეგ ხელისუფლებას ამუნათებდით, რომ, სამწუხაროდ, რატომ მოუხდა პოლიციას წყლის ჭავლის გამოყენება. მე ძალიან ვწუხვარ იმ მოქალაქეების გამო, ვინც გუშინ დაზიანებები მიიღეს, თუმცა კიდევ ერთხელ ვამბობ — ეს იყო, პირველ რიგში, აი ამ უპასუხისმგებლო ლიდერების ბრალი, რომლებმაც ეს ხალხი დამუხტეს, მიმართეს და აიძულეს იქეთკენ, რომ მისულიყვნენ ცესკოსთან", — განაცხადა თალაკვაძემ რუსთავი 2-ის ეთერში.

პარლამენტის თავმჯდომარე აღნიშნავს, რომ აქციის მონაწილეები პოლიციას გარკვეულ ნივთებს ესროდნენ და მათ სამართალდამცავებს სხვა გზა არ დაუტოვეს.

"ეს ჯგუფები პოლიციას ესროდნენ არმატურებს და ესროდნენ ქვებს და ამ შემთხვევაში, სამწუხაროდ, მათ სხვა გზა არ დაუტოვეს" — ამბობს თალაკვაძე.

სპეცრაზმმა აქცია გაფრთხილების გარეშე დაშალა — რა ხდება ცესკოსთან

8 ნოემბერს ოპოზიციამ პარლამენტთან საპროტესტო აქცია გამართა, რომელზეც მთავრობას სამი მოთხოვნა წამოუყენა და დრო რვა საათამდე მისცა. ისინი ხელახალ არჩევნებს, ცესკოს თავმჯდომარის გადადგომას და პოლიტპატიმრების გათავისუფლებას ითხოვდნენ. ულტიმატუმის ვადის ამოწურვის შემდეგ ნიკა მელიამ განაცხადა, რომ მათთან კონტაქტზე მყოფმა ირაკლი კობახიძემ და არჩილ თალაკვაძემ ხვალ შეხვედრა შესთავაზეს, რასაც არ დათანხმდებოდნენ. ეს კობახიძემ უარყო და ამტკიცებდა, რომ შეხვედრა ოპოზიციამ მათ შესთავაზა და ამას მხოლოდ პარტნიორების სურვილის შემთხვევაში დათანხმდებოდნენ.

რვა საათის შემდეგ ოპოზიციამ განაცხადა, რომ ცესკოსთან გადაინაცვლებდნენ და არავის მისცემდნენ შიგნით შესვლის ან იქედან გამოსვლის უფლებას. სანამ ოპოზიცია მსვლელობით მივიდოდა, ცესკოსთან რამდენიმე ადამიანი შეიკრიბა. ადგილზე მობილიზებული იყო პოლიცია, რომელთა რაოდენობამ იზრდებოდა. ცესკოსთან მოხდა რამდენიმე დაპირისპირებაც, თუმცა მალევე აღმოიფხვრა.

ამის შემდეგ კი ადგილზე სპეცრაზმი გამოჩნდა, რომელმაც გაფრთხილების გარეშე დაიწყო წყლის ჭავლის გამოყენება აქციის მონაწილეების წინააღდეგ. აქციაზე გაუშვეს სავარაუდოდ ცრემლსადენი გაზიც, თუმცა შსს ამას უარყოფს. რაც შეეხება წყლის ჭავლს, ამას პროპორციულ ძალად მიიჩნევს. ამ ეტაპზე არსებული ინფორმაციით, აქციის დაშლისას 2 ადამიანი დაშავდა.

უფლებადამცველები, ყოფილი და მოქმედი სახალხო დამცველები კი აცხადებენ, რომ აქციის დაშლა ამ მეთოდით არაკანონიერი იყო და არღვევდა გამოხატვის თავისუფლებას. მათივე თქმით, ეს იყო სასტიკი და არაპროპორციული ძალა.

გაიგეთ მეტი მომხდარის პოლიტიკურ შეფასებებზე: