სტრატეგია აღმაშენებლის ლიდერი, გიორგი ვაშაძე ამბობს, რომ საზოგადოებამ ენერგია და ძალები უნდა შეინახოს იმ "გადამწყვეტი" დღეებისთვის, რომელიც შედეგის "დასაყენებლად" იქნება მნიშვნელოვანი. ასე მიმართა პარლამენტთან შეკრებილ მოსახლეობას გიორგი ვაშაძემ და დღის ბოლოს ოპოზიციის "სამოქმედო გეგმის" გაცნობა დააანონსა.

"ჩვენი ბრძოლა, ჩემო ძვირფასებო, არ არის ერთჯერადი, არ არის ერთდღიანი, დიახ, ეს არის განგრძობადი, მაგრამ ეს არის მშვიდობიანი პროტესი. სამწუხაროდ, ქართულმა ოცნებამ დაამკვიდრა, რომ მხოლოდ აქედან, ქუჩიდან შეძილება ვაიუძულოთ კონკრეტული სწორი ნაბიჯების გადადგმა, მხოლოდ ხალხის პროტესტის ფონზე ხდება გადაწყვეტილებების მიღება, რადგან მათ მოშალეს პარლამენტი, სასამართლო, აღმასრულებელი ხელისუფლება, ეს აღარ გვინდა, ჩვენ გვინდა ხალხზე ორიენტირებული მმართველობა", — განაცხადა ვაშაძემ.

დღეს პარლამენტთან ოპოზიციის წარმომადგენლები აქციას მართავენ. ისინი აცხადებენ, რომ აქციის ბოლოს საზოგადოებას მათ სამოქმედო გეგმას წარუდგენენ.

ოპოზიციის მიერ ორგანიზებული აქცია გუშინ 8 ნოემბერსაც გაიმართა. ოპოზიციამ მთავრობას სამი მოთხოვნა წამოუყენა და დრო რვა საათამდე მისცა. ისინი ხელახალ არჩევნებს, ცესკოს თავმჯდომარის გადადგომას და პოლიტპატიმრების გათავიუფლებას ითხოვდნენ. ულტიმატუმის ვადის ამოწურვის შემდეგ ნიკა მელიამ განაცხადა, რომ მათთან კონტაქტზე მყოფმა ირაკლი კობახიძემ და არჩილ თალაკვაძემ ხვალ შეხვედრა შესთავაზეს, რასაც არ დათანხმდებოდნენ. ეს კობახიძემ უარყო და ამტკიცებდა, რომ შეხვედრა ოპოზიციამ მათ შესთავაზა და ამას მხოლოდ პარტნიორების სურვილის შემთხვევაში დათანხმდებოდნენ.

რვა საათის შემდეგ ოპოზიციამ განაცხადა, რომ ცესკოსთან გადაინაცვლებდნენ და არავის მისცემდნენ შიგნით შესვლის ან იქედან გამოსვლის უფლებას. სანამ ოპოზიიცია მსვლელობით მივიდოდა, ცესკოსთან რამდენიმე ადამიანი შეიკრიბა. ადგილზე მობილიზებული იყო პოლიცია, რომელთა რაოდენობამ იზრდებოდა. ცესკოსთან მოხდა რამდენიმე დაპირისპირებაც, თუმცა მალევე აღმოიფხვრა.

ამის შემდეგ კი ადგილზე სპეცრაზმი გამოჩნდა, რომელმაც გაფრთხილების გარეშე დაიწყო წყლის ჭავლის გამოყენება აქციის მონაწილეების წინააღდეგ. აქციაზე გაუშვეს სავარაუდოდ ცრემლსადენი გაზიც, თუმცა შსს ამას უარყოფს. რაც შეეხება წყლის ჭავლს, ამას პროპორციულ ძალად მიიჩნევს. ამ ეტაპზე არსებული ინფორმაციით, აქციის დაშლისას 30-მდე ადამიანი დაშავდა, მათგან 5 კლინიკებში გადაიყვანეს.

უფლებადამცველები, ყოფილი და მოქმედი სახალხო დამცველები კი აცხადებენ, რომ აქციის დაშლა ამ მეთოდით არაკანონიერი იყო და არღვევდა გამოხატვის თავისუფლებას. მათივე თქმით, ეს იყო სასტიკი და არაპროპორციული ძალა.