სახალხო დამცველ ნინო ლომჯარიას განცხადებით, ცალკეულ შემთხვევებში, რაც საარჩევნო უბნებზე მოხდა, არჩევნების გაყალბება ჰქვია. თუმცა, მისივე თქმით, ყველა ოქმთან დაკავშირებით, სანამ ყველა არ გადაითვლება, ამას ვერ იტყვის.

"თუმცა ამას სჭირდება შესაბამისი სამართლებრივი პროცედურების გატარება. ცალკეულ შემთხვევებში ნამდვილად ვხედავ სისხლის სამართლის დანაშაულის ნიშნებს და ვფიქრობ, რომ უნდა დაიწყოს გამოძიება და გაირკვეს ამ პროცესში ვის რა როლი ჰქონდა", — განაცხადა ომბუდსმენმა პალიტრანიუსთან.

მისივე აზრით, სისხლის სამართლის საქმის აღძვრის საფუძველი ამ ეტაპზე საარჩევნო კომისიების იმ წევრების მიმართ არსებობს, ვინც შემაჯამებელი ოქმები გააყალბა.

სახალხო დამცველი ცესკოს მუშაობასაც უარყოფითად აფასებს. ლომჯარიას თქმით, თამარ ჟვანიას, როგორც ადმინისტრაციის ხელმძღვანელს, საკუთარი თანამშრომლების მხრიდან ჩადენილი სისტემური თუ ფართომასშტაბიანი დარღვევების გამო პასუხისმგებლობა ეკისრება. ომბუდსმენის განცხადებით, ჟვანიას მხრიდან სწორ სამართლებრივ გზავნილებს ადგილი არ ჰქონია.

"სწორი იქნებოდა, საჯაროდ მოუწოდებდეს ქვემდგომ საარჩევნო ადმინისტრაციებს, რომ გადაითვალოს ყველა პრობლემური საარჩევნო უბანი, გაიხსნას საარჩევნო მასალა, თუმცა მისი მხრიდან ამგვარ მოწოდებებსა და განცხადებებს ვერ ვხედავთ. ის, ძირითადად, აპელირებს, რომ ხდება ოქმების ჩასწორება. სწორედ ჩასწორების პროცესია პრობლემატური. არ შეიძლება ოქმების ჩასწორება მხოლოდ კომისიის წევრების ახსნა-განმარტებების საფუძველზე. ამას გადათვლა, გადამოწმება და რეალური შედეგების დადგენა სჭირდება", — ამბობს ლომჯარია.

ის, ასევე, ცესკოზე მმართველი პარტიის ზეწოლას არ გამორიცხავს.

სახალხო დამცველის შეფასებით, 31 ოქტომბრის არჩევნების მთავარი პრობლემა ხმის დათვლის პროცესში გამოვლენილ სერიოზულ ხარვეზებში მდგომარეობდა. მისი თქმით, უფრო ცუდი იყო კენჭისყრის შეჯამება და ხმის დათვლის პროცესი, ვიდრე არჩევნების დღე.

“საარჩევნო ოქმებში დაფიქსირებული სერიოზული დისბალანსი, შემაჯამებელ ოქმების გადასწორება და სხვა პრობლემები, ნამდვილად მასშტაბური იყო", — განაცხადა ლომჯარიამ.

მისივე განცხადებით, არჩევნებზე მისულ ამომრჩეველთან შედარებით გადაჭარბებული ბიულეტენების რაოდენობა საარჩევნო უბნების 8%-ში გვხვდება.

"არის სხვა ტიპის სერიოზული პრობლემები, როდესაც ხელმოწერების რაოდენობა არ ემთხვევა, როდესაც ოქმები თვითნებურად სწორდებოდა, რისი უფლებაც საარჩევნო კომისიის წევრებს არა აქვთ. იყო სხვა ტიპის დისბალანსიც. ამიტომ, პროტესტი და მოთხოვნები, რაც საზოგადოებაში ისმის, არის სამართლიანი და სამართლებრივად დასაბუთებული", — აღნიშნავს ომბუდსმენი.

სახალხო დამცველის თქმით, მოცემულ ვითარებაში საჩივრების, სარჩელების სამართლიან განხილვას ალტერნატივა არ აქვს.