გაერთიანებული ოპოზიციის ენმ — ძალა ერთობაშიას წვერმა, თამარ კორძაიამ ირაკლი კობახიძეს მიმართა, რომ არ ებრძვის პატარა კაცებსა და პატარა ადამიანებს, ისინი, უბრალოდ, ეცოდება.

"მივმართავ საერთაშორისო ორგანიზაციებსა და ყველა ჩვენს პარტნიორ სახელმწიფოს, ის, რაც ხდებოდა არჩევნების დღეს, რაც ხდება არჩევნების მერე, ენით აღუწერელი დარღვევები და დანაშაულებია. დანაშაულებრივ ქაოსში საქართველოს ხელისუფლებამ ვერ გაასწორა მონაცემები. კომენტარი ირაკლი კობახიძის, რომლითაც ის ხსნის, რომ ეს ადამიანური შეცდომებია, შესაძლოა, იყოს მართალი იმიტომ, რომ ეს დაშინებული, დაშანტაჟებული და მოსყიდული ადამიანები 100%-იანი სიზუსტით ვერ დასვამდნენ ოქმებში გაყალბებულ მონაცემებს", — განაცხადა თამარ კორძაიამ.

ქართული ოცნების აღმასრულებელმა მდივანმა, ირაკლი კობახიძემ განაცხადა, რომ დაუბალანსებელი ოქმები საქართველოში ჩატარებულ ყველა არჩევნებზე იყო და ამის მიზეზად "ადამიანური შეცდომა" დაასახელა.

"არჩევნების არალეგიტიმურად გამოცხადების ერთ-ერთ მთავარ არგუმენტად ოპოზიცია იყენებს დაუბალანსებელ ოქმებს, ამასთან დაკავშირებით განვმარტავთ, რომ დაუბალანსებელი ოქმები საქართველოში ჩასატარებელ ყველა არჩევნებზე ფიქსირდებოდა, რისი მიზეზიც ადამიანური შეცდომაა. ყურადღებას გავამახვილებთ იმ გარემოებაზეც, რომ ამგვარი ხარვეზები, ხშირ შემთხვევაში, ჩვენი პარტიისა და კანდიდატების საზიანოდ ფიქსირდება", — განაცხადა კობახიძემ.

ოპოზიციური პარტიები 31 ოქტომბერს ჩატარებული საპარლამენტო არჩევნების ლეგიტიმაციას კითხვის ნიშნის ქვეშ აყენებენ, რისი ერთ-ერთი განმაპირობებელი მიზეზიც დაუბალანსებელი ოქმებიცაა. ოპოზიცია 1 ნოემბრიდან, ყოველდღიურად აქციებს მართავს, პარლამენტში შესვლაზე უარს აცხადებს და რიგგარეშე არჩევნებს ითხოვს.