მონტენეგროს ყოველდღიური გაზეთის, Vijesti-ის ცნობით, ეპისკოპოს ამფილოიე რადოვიჩის დაკრძალვაზე, პოდგორიცას სერბულ მართლმადიდებლურ ეკლესიაში, მრევლმა უსაფრთხოების წესები "უხეშად უგულებელყო".

სასულიერო პირი კორონავირუსით ოქტომბრის დასაწყისში დაინფიცირდა. აგვისტოს არჩევნებში მან მხარი დაუჭირა ოპოზიციურ პარტიებს, რათა ახალი მთავრობა შექმნილიყო პრეზიდენტ მილო დიუკანოვიჩის თანამდებობიდან გადასაყენებლად. დიუკანოვიჩი პროდასავლურ სოციალისტების დემოკრატიულ პარტიას წარმოადგენს.

ნევენკა პავლიჩიჩმა — იმ საავადმყოფოს დირექტორმა, სადაც ამფილოიე მკურნალობდა — დაჟინებით მოითხოვა ხელისუფლებისგან, დაკრძალვაზე არ ყოფილიყო თავახდილი კუბო, რადგან ეს "დაავადების გავრცელების რისკს" შეიცავდა. ექიმებმაც განაცხადეს, რომ საჭირო იყო გარდაცვლილი სასულიერო პირის სასახლე დაკრძალვაზე მოსული მრევლისთვის თავდახურული ყოფილიყო.

გაფრთხილებებისდა მიუხედავად, მგლოვიარე მრევლი ცხედარს უპირბადოდ, დისტანციის დაცვის გარეშე მიუახლოვდა და რამდენიმე მათგანი ეპისკოპოსის შუბლსაც კი ეამბორა.

ეპისკოპოს ამფილოიეს თავახდილი კუბოს გარშემო ათასობით ადამიანმა მოიყარა თავი.

ფოტო: Risto Bozovic / AP Photo / Picture Alliance

მონტენეგროს პრემიერმინისტრ ზდრავკო კრივოკაპიჩის თქმით, ეპისკოპოსი ამფილოიე "ქვეყნის ერთ-ერთი ღირსშესანიშნავი ადამიანი იყო".

ქვეყანაში, სადაც მოსახლეობა სულ რაღაც 620 ათასია, მთავრობა უკვე რამდენიმე თვეა, ვირუსის მასობრივ გავრცელებას ებრძვის. აპრილში სერბი მიტროპოლიტი დააკავეს, რომელიც შეზღუდვებისდა მიუხედავად წირვას ატარებდა. აღსანიშნავია, რომ მონტენეგროში მცხოვრები ადამიანების მესამედი სერბია.

ეპისკოპოსი ამფილოიე, რომლის ხედვებით ანტიდასავლური და პრორუსული იყო, მონტენეგროს 2006 წლის რეფერენდუმში სერბეთის შემადგენლობაში დარჩენას უჭერდა მხარს. ბოლო წლებში კი იგი დიუკანოვიჩისგან ახალ რეგულაციას მოითხოვდა, რომელიც რელიგიურ საკუთრებას დააკანონებდა.

მაისში, როცა პოდგორიცას მახლობლად მდებარე მონასტერში მომლოცველები იყვნენ შეკრებილნი, ამფილოიემ მე-17 საუკუნეში მცხოვრები წმინდა ვასილიე ოსტროსკი სასწაულმოქმედის თაყვანისცემის რიტუალს "ღვთიური ვაქცინა" უწოდა.

"კარგი იქნება, თუკი თანამედროვე მეცნიერები ვაქცინას შექმნიან... თუმცა მანამდე, იგი უკვე ნაპოვნია... ეს არის ვაქცინა, რომელიც საუკუნეების განმავლობაში მოქმედებდა", — განაცხადა ეპისკოპოსმა მსახურებისას.

ამფილოიე ხშირად ჩნდებოდა საზოგადოებრივი თავშეყრის ადგილებში პირბადის გარეშე და სხვა მღვდელმსახურებთან ერთად, კორონავირუსთან დაკავშირებული რეგულაციების მიუხედავად, ატარებდა ლიტურგიას. ეპისკოპოსი კარანტინის წინააღმდეგ ჩატარებულ საპროტესტო აქციებსაც უძღვებოდა.

მონტენეგროში ამ დროისთვის კორონავირუსით დაინფიცირების 18 714 შემთხვევაა დადასტურებული, გარდაცვლილთა რიცხვი კი 313-ს შეადგენს.