Bad B-ს მფლობელმა ლიზა ფილიპემ კითხვისადმი ენთუზიაზმი თავის ცისფერ სუძუკში, სახელად დედოფალში მოათავსა და გაუყვა გზას სასიყვარულო წიგნების გასაყიდად.

მისი თავგადასავალი სასიყვარულო წიგნების მოძრავი მაღაზიით იწყება, რომელიც ახლახან გრანდიოზულად გაიხსნა სავაჭრო ქუჩის მიმდებარედ Bigger-ის ბაზარზე.

"ყოველთვის მინდოდა წიგნის მაღაზია მქონოდა, მაგრამ როგორც წესი, სამსახურეობრივ და ოჯახურ მოვალეობებს ვერსად გავურბივართ და ამიტომ, ოცნებებს ასრულება არ უწერიათ, სანამ ამისთვის შესაფერისი დრო არ დადგება. ეს სწორედაც შესაფერისი დროა" — ამბობს ის.

მას სურდა შეეძინა ადგილობრივი წიგნის მაღაზია, რომელიც ფასდაკლებით იყიდებოდა, მაგრამ მოძრავი წიგნის მაღაზიის იდეა მოსვენებას არ აძლევდა.

"ოცნების ახდენას ვილმინგტონში შევძლებ, რადგან აქ მსგავსი არაფერია" — თქვა მან, როდესაც თავისი ახალი ბიზნესის კონცეფციაზე საუბრობდა. "მე ვიმოგზაურებ და მივალ იმ ადგილებში, სადაც არც ერთი წიგნის მაღაზია არ არის".

ლიზა პოპულარული საკითხავების სიიდან სხვადასხვა სახის სასიყვარული წიგნებს ყიდის, დაწყებული ისეთი წიგნებიდან როგორიცაა ემილი ჰენრის სასაცილო ამბავი (Funny Story), დასრულებული — ადგილობრივი დამოუკიდებელი ავტორების წიგნებით.

ამავდროულად ლიზა ნიუ-იორკ თაიმზის ბესტსელერების ავტორებისთვის მუშაობს და წიგნის ტურებს აორგანიზებს. მისი თქმით, თავისი სამსახურის მეშვეობით რომანტიკული წიგნებისადმი სიყვარული ხელახლა აღმოაჩინა.

"ზოგიერთი ჩემთვის ძვირფასი წიგნი აქ არის" — თქვა მან გასაყიდი წიგნების არჩევისას. "ბევრ ისეთ წიგნს ვყიდი, რომელიც მე თვითონ წამიკითხავს, მაგალითად ბესტსელერებს. ამასთან, ხელშეკრულებებს ვუგზავნი იმ დამოუკიდებელ ავტორებს, რომლებსაც ჩემს სატვირთოზე მოხვედრა სურთ".

მისი თქმით, მნიშვნელოვანია, მხარი დავუჭიროთ დამოუკიდებელ მწერლებს. მას ამ ავტორების დახმარება სურს, რათა უფრო მეტ თაროზე გაჩნდეს მათი წიგნები. გარდა ამისა, ფილიპეს აქვს ისეთი წიგნებიც როგორიცაა ფენტეზი და LGBTQ ლიტერატურა, რათა მყიდველს სასიყვარულო წიგნების მრავალფეროვანი არჩევანი შესთავაზოს.

ფილიპეს მოძრავ წიგნის მაღაზიაში სხვა ნივთებსაც იპოვით. წიგნის სანიშნეები, თემატური სტიკერები და დიდი ჩანთები — ამ ნივთებს ის დამწყები ბიზნესებისგან ყიდულობს.

"მომწონს, როცა კრეატიულ ხალხს ვეხმარები. ახალბედები მხარს ვუჭერთ ახალბედებს" — ამბობს ლიზა.

ფილიპე ჰყვება, როგორი ბედნიერი იყო, როცა სატვირთო მოიყვანა და რამხელა შრომა ჩადო თავის საქმეში. კვირების განმავლობაში გაწეული ძალისხმევის შედეგად — მათ შორის რეკლამირება, საქონლის შესყიდვა და წიგნების არჩევა — ყველაფერი დალაგდა.

"ყოველთვის მინდოდა საკუთარი წიგნების მაღაზია. თუმცა ეს გაცილებით სახალისოა, რადგან არასდროს არ ვარ ერთსა და იმავე ადგილას გაჩერებული. შემიძლია წავიდე იქ, სადაც მინდა. შემიძლია წავიდე ჰემპსტედში ან მაიმუნის გზაჯვარედინზე (Monkey Junction) და იქ გავყიდო წიგნები. ეს ძალიან სახალისოა" — ამბობს ლიზა.