ჩეჩნეთის ლიდერმა რამზან კადიროვმა ისრაელი და დასავლეთი პალესტინელი ხალხის გენოციდში დაადანაშაულა და ირანის მიერ ისრაელზე თავდასხმების მიმართ მხარდაჭერა გამოხატა, მათ "ტაქტიკურად სწორი" უწოდა.

კადიროვმა ეს განცხადებები ხუთშაბათს Telegram-ზე გამოქვეყნებულ პოსტში გააკეთა, სადაც ასევე ირანის ბირთვული პროგრამის მიმართ მხარდაჭერა დააფიქსირა. მისი თქმით, თეირანი მოქმედებს საერთაშორისო ინსპექციების ჩარჩოში და მისდევს მხოლოდ მშვიდობიან ბირთვულ გამდიდრებას.

მისივე მტკიცებით, ისრაელი და მისი მოკავშირეები "სრულიად სხვა მოტივებით" ხელმძღვანელობენ. კადიროვი მოუწოდებს საერთაშორისო საზოგადოებას ყურადღება გაამახვილონ იმაზე, რასაც ის უწოდებს ისრაელის ფარულ ბირთვულ პროგრამას — კითხვის ნიშნის ქვეშ აყენებს, რამდენი ბირთვული ქობინი აქვს ისრაელს და რატომ უნდა იყოს მისი სამხედრო ბირთვული პროგრამა ნაკლებად შემაშფოთებელი, ვიდრე ირანის მშვიდობიანი პროგრამა.

"დეკადების განმავლობაში განხორციელებული პროვოკაციებისა და ირანელი სამხედროებისა და მეცნიერების წინააღმდეგ ზიონისტების მიერ მოწყობილი ტერორისტული ოპერაციების შემდეგ, ირანის ხელისუფლება იძულებული გახდა ეპასუხა ისრაელის სატანურ აგრესიაზე — ქვეყანაზე, რომელიც მთელი ახლო აღმოსავლეთს უკაცრიელ უდაბნოდ ქცევაზე ოცნებობს [...]საერთაშორისო საზოგადოებამ ახლა უნდა დასვას გაცილებით მნიშვნელოვანი კითხვა: რამდენი ბირთვული ქობინი აქვს ისრაელს და რატომ არის მისი სამხედრო ბირთვული პროგრამა ნაკლებად შემაშფოთებელი, ვიდრე ირანის მშვიდობიანი პროგრამა?", — დაწერა კადიროვმა.

კადიროვმა ირანის პასუხი დაახასიათა როგორც „ლოგიკური და ტაქტიკურად სწორი“ და ისრაელსა და ირანს შორის მიმდინარე კონფლიქტი კი აშშ-ის ხელმძღვანელობით განხორციელებულ ერაყის შეჭრას შეადარა.

"დეკადების განმავლობაში ვისმენდით ზიონისტებისა და დასავლელი "სატანისტებისგან", რომ ირანი ბირთვული იარაღის შექმნასთან იყო ახლოს. 30 წლის წინ ამბობდნენ — "ხვალვე ექნებათ", 20 წლის წინაც იგივე, 10 წლის წინაც. სად არის ეს იარაღი? ალბათ იმავე ადგილზე, სადაც ერაყის არარსებული ბირთვული იარაღი," — წერს კადიროვი. "შესაძლო ბირთვული იარაღის არსებობის სახელით გაანადგურეს ერაყი, მოკლეს სადამ ჰუსეინი, ასობით ათასი მშვიდობიანი მოქალაქე ამოხოცეს, ქვეყანას ათწლეულებით უკან დაახევინეს და ახლა იმავეს ამზადებენ ირანთან მიმართებით."

კონფლიქტი ისრაელსა და ირანს შორის 13 ივნისს გამწვავდა, როდესაც ისრაელის თავდაცვის ძალებმა (IDF) ირანის ბირთვულ ობიექტებსა და სხვა სამიზნეებს დაარტყეს. პასუხად, ირანმა რაკეტები და დრონები ისრაელის ქალაქების მიმართულებით გაუშვა. მას შემდეგ, ორივე მხარე ერთმანეთზე შეტევებს ახორციელებს.

რუსეთმა ისრაელის დარტყმები ირანზე დაგმო და განაცხადა, რომ საჭიროა თავიდან ავიცილოთ ფართომასშტაბიანი ომი რეგიონში. 19 ივნისს, რუსეთის პრეზიდენტმა ვლადიმირ პუტინმა, გლობალური საინფორმაციო სააგენტოების ხელმძღვანელებთან შეხვედრისას განაცხადა, რომ ორივე მხარემ უნდა მოძებნოს კომპრომისული გზა საომარი მოქმედებების დასასრულებლად. პუტინის თქმით, ნებისმიერი გადაწყვეტილებამ უნდა უზრუნველყოს როგორც ირანის უფლება მშვიდობიან ბირთვულ ენერგიაზე, ისე ისრაელის სახელმწიფო უსაფრთხოება.

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება.

საქართველოში OC Media-ის პარტნიორი On.ge-ა. სტატია ინგლისურად შეგიძლიათ წაიკითხოთ აქ.