ცენტრალური საარჩევნო კომისიის თავმჯდომარე თამარ ჟვანია კრიტიკას ოქმების გაყალბების შესახებ "აბსოლუტურ აბსურდსა" და "საუკუნეების მიღმა ჩაარჩენილ შეფასებას" უწოდებს. მისი თქმით, თითოეული უბნიდან საბოლოო ოქმის ასლის წაღება შუეძლია ყველა დამკვირვებელს, რომელიც უბანზე იმყოფება, შესაბამისად, მათ შეუძლიათ გადამოწმება გაყალბების შემთხევაში.

"ის არასერიოზული შეფასებები, რომლებიც გულისხმობს, რომ გზაში ვიღაცა რაღაცას ცვლის, იქნება ეს ოლქი თუ ცესკო, ეს არის აბსოლუტური აბსურდი და მე მგონი, საუკუნეებს მიღმა ჩარჩენილი შეფასება, რომელიც დიდი ხანია განვითარებულ საქართველოს თავისი ისტორიიდან აქვს წაშლილი", — განაცხადა მან.

ჟვანია აცხადებს, რომ ცესკო დათვლის შედეგებს ზუსტად, ისევე, როგორც აქამდე ითვლიდა. მათ მიმართ სანდოობაზე საუბრისას ის აცხადებს, რომ ცესკოს შედეგები ხშირად ემთხვეოდა გავლენიანი არასამთავრობოებისას.

მან მიმართა საზოგადოებას, რომ არ აყვნენ პოლიტიკურ ინტერესებს და განაცხადა, რომ ცესკო არა პარტიებს, არამედ ხალხს ემსახურება.

"ყველას ახსოვდეს, მხოლოდ ამომრჩევლის ნებაა ამ ქვეყანაში კანონი", — განაცხადა მან.

ცესკოს პირველადმა შედეგებმა ოპოზიციის კრიტიკა და გაღიზიანება გამოიწვია. პოლიტიკური პარტიის ლიდერები აცხადებენ, რომ არჩევნების შედეგები რეალობას არ ასახავს. გვიან ღამით ისინი ცესკოს ოფისთან შეიკრიბნენ და გააპროტესტეს. ადგილზე მობილიზებული იყო პოლიცია.

ხვალ, 16:00 საათზე ოპოზიცია საპროტესტო აქციას გეგმავს, სადაც გაჟღერდება მათი გეგმებისა და მოთხოვნების შესახებ.

ცესკოს პირველადი შედეგები მიახლოებულია იმედის დაკვეთით ჩატარებული ეგზტიპოლის მონაცემებთან, რომლის მიხედვითაც, "ოცნებას" — 54%, ენმ-სა და ძალა ერთობაშიას კი 24% აქვს.

გაიგეთ მეტი ეგზიტპოლების შედეგებზე: