საარჩევნო უბნებთან მობილიზებული პირები, სავარაუდო აგიტატორები და კოორდინატორები იყვნენ სახალხო დამცველის, ნინო ლომჯარიას მთავარი განხილვის საკითხები. ომბუდსმენმა ტელეკომპანია მთავარის პირდაპირ ეთერში საარჩევნო პროცესებზე ისაუბრა.

ნინო ლომჯარიამ აღნიშნა, რომ აღნიშნული პირები განსაკუთრებულ აგრესიას მედიის წარმომადგენლების მიმართ იჩენდნენ და დასძინა, რომ შსს-სგან გამოძიებას სპეციალური მუხლით მოითხოვს:

"თვალში მოსახვედრი იყო ის, რომ განსაკუთრებულ აგრესიას იჩენდნენ ჟურნალისტების მიმართ და არაერთი შემთხვევა დავაფიქსირეთ ჟურნალისტებისთვის ხელის შეშლის. ახლახან გავავრცელეთ ინფორმაცია და მოვუწოდეთ შინაგან საქმეთა სამინისტროს რომ თითოეულ ამ ფაქტზე გამოძიება დაიწყონ სპეციალური მუხლის საფუძველზე, რომელიც ჟურნალისტური სამუშაოს ხელის შეშლას ითვალისწინებს და არა სხვა ზოგად მუხლებს".

მან აღნიშნა, რომ დაელოდება არასამთავრობო ორგანიზაცია სამართლიანი არჩევნების განცხადებას და იმის მიხედვით შეაფასებს, მოახდენდა თუ არა გავლენას არჩევნების საბოლოო შედეგებზე უბნებთან დაფიქსირებული დარღვევები.

ამის მიუხედავად, გლდანის 79-ე უბანთან პუბლიკას ჟურნალისტის თავდასხმის საქმეზე გამოძიება სისხლის სამართლის კოდექსის 187-ე მუხლით დაიწყო, რაც ნივთის დაზიანებასა და განადგურებას გულისხმობს. აღნიშნული გააპროტესტა საიამ და განაცხადა, რომ საგამოძიებო კვალიფიკაცია არასწორად იყო მინიჭებული. არჩევნების დღეს ჟურნალისტთა უფლებების დარღვევის ფაქტებზე სათანადო რეაგირებას მოითხოვა კოალიციამ მედია ადვოკატირებისთვის.

31 ოქტომბერს, არჩევნების მიმდინარეობის პარალელურად, მარნეულში, ევროპული საქართველოს წარმომადგენელმა On.ge-ს ჟურნალისტს აჩვენა, რომ შეიარაღებულია და მუშაობაში ხელი შეუშალა. აღნიშნულ ფაქტზე საერთაშორისო გამჭვირვალება საქართველოს დირექტორმა, ეკა გიგაურმა განაცხადა, რომ კონკრეტული პირის პასუხისმგებლობა უნდა დადგეს.

ამავე თემაზე: