ახალგაზრდა იურისტთა ასოციაციის თავმჯდომარის, სულხან სალაძის განცხადებით, ჟურნალისტების საქმიანობაში ხელის შეშლის შემთხვევებზე გამოძიება სწორედ ამ მუხლით უნდა მიმდინარეობდეს და არა ნივთის დაზიანების მუხლით.

"მედიასაშუალებებს უნდა მიეცეთ საქმიანობის შეუფერხებლად განხორციელების საშუალება. ბუნებრივია, მხოლოდ ნივთის დაზიანებით დაწყებული გამოძიება არ არის სწორი კვალიფიკაცია", — განაცხადა სალაძემ.

ჟურნალისტის კითხვაზე, თუ საქმე არ გადაკვალიფიცირდება, სალაძე პასუხობს, რომ ახალგაზრდა იურისტთა ასოციაციის ადვოკატები მათ სამართლებრივ დახმარებას გაუწევენ.

"თუ არ გადაკვალიფიცირდება საქმე, ჩვენ მზად ვართ მედიასაშუალებებს გავუწიოთ სამართლებრივი დახმარება, მათ შორის, საგამოძიებო ორგანოებისთვის განცხადებით მიმართვაზე, მათი მხრიდან, დაზარალებულად ცნობის შემთხვევაში. თუ კვალიფიკაცია შეიცვლება და სტატუსი მიენიჭებათ, ასევე მზად ვართ, გავუწიოთ საადვოკატო მომსახურებაც. ჩვენი სისხლის სამართლის ადვოკატები მზად არიან ნებისმიერ დროს მედიას გაუწიონ კვალიფიციური დახმარება", — ამბობს სულხან სალაძე.

მარნეულში, სოფელ აზიზ ქენდიში, #14 უბანზე მყოფ On.ge-ს ჟურნალისტს ევროპული საქართველოს წარმომადგენელმა მუშაობაში ხელი შეუშალა. დარინა ქამადაძის თქმით, უბანზე ფოტოების გადასაღებად შევიდა, რეგისტრაციის დროს კი შენიშნა ადამიანი, რომელიც საეჭვოდ მოეჩვენა და ჰკითხა, რომელ ორგანიზაციას წარმოადგენდა. ჟურნალისტი აღნიშნავს, რომ ამ პირმა ჯერ ცესკოს მიერ გაცემულ დამკვირვებლის მოწმობაზე მიუთითა, რომელიც ქურთუკის ქვეშ ჰქონდა, შემდეგ კი აჩვენა, რომ შეიარაღებულია. დარინა ქამადაძის თქმით, კითხვაზე, რატომ გადაადგილდება უბანზე იარაღით, კაცმა უპასუხა, რომ ეს მისი იარაღია.

დღესვე, გლდანის 79-ე უბანზე ერთიანი ნაციონალური მოძრაობისა და ქართული ოცნების აქტივისტები ერთმანეთს დაუპირისპირდნენ. შედეგად ინტერნეტ გამოცემა პუბლიკას ჟურნალისტ მინდია გაბაძეს ტელეფონი დაუზიანეს. ადგილზე იმყოფებოდნენ საპატრულო პოლიციის თანამშრომლები.

გარდა ამისა, გლდანში, 39-ე სკოლასთან არსებულ საარჩევნო უბანზე TV პირველის ჟურნალისტი დაშავდა. როგორც ტელევიზიის მიერ გავრცელებულ კადრებში ჩანს, უბანზე მთელი დღის მანძილზე დაძაბული სიტუაცია იყო, რა დროსაც, ჟურნალისტებს პროფესიული საქმიანობის შესრულების დროს ხელი ხშირად ეშლებოდათ. სავარაუდოდ, ერთ-ერთი დაპირისპირების დროს ჟურნალისტს კამერა მოხვდა.

2020 წლის საპარლამენტო არჩევნების შესახებ

დღეს 31 ოქტომბერს, საქართველოს პარლამენტის არჩევნები იმართება. წელს პირველად, საარჩევნო სისტემა ყველაზე მეტად მიუახლოვდა სრულად პროპორციულს და არჩევნების 120/30 მანდატების თანაფარდობით ტარდება. აღნიშნული 8 მარტს ოპოზიციისა და მმართველ გუნდს შორის აშშ-ს ელჩის რეზიდენციაში გამართულ არაფორმალურ შეხვედრაზე გადაწყდა. იქვე, სამთავრობო გუნდი და ოპოზიცია, ასევე, შეთანხმდა, რომ პარტია, რომელიც 40%-იან მხარდაჭერას ვერ მოიპოვებს, მთავრობის დაკომპლექტებას ვერ შეძლებს. რაც შეეხება ბარიერს, იგი — 1%-ია.

მთელი ქვეყნის მასშტაბით საარჩევნო უბნები 8 საათზე გაიხსნა და ხმის მიცემის პროცესი დაიწყო. უბნები დღეს 20:00 საათზე დაიხურება.

ისტორიაში პირველად, არჩევნები პროპორციულთან მიახლოებული, 120/30-ზე სისტემით გაიმართება.

გაიგეთ მეტი არჩევნებზე: