პარლამენტის თავმჯდომარემ, არჩილ თალაკვაძემ საკუთარი არჩევანი უკვე დააფიქსირა. როგორც მან ჟურნალისტებთან განაცხადა, ქართული ოცნება 55-დან 60%-მდე მხარდაჭერის ფონზე მოელის, რომ საზოგადოება დამაჯერებელ მხარდაჭერას უზრუნველყოფს მათთვის.

"წლების განმავლობაში ქართული ოცნება იდგა ადამიანების გვერდით და, რა თქმა უნდა, ჩვენ მადლობელნი ვართ, რომ დღეს ჩვენი მოქალაქეები დგანან ჩვენს გვერდით, სახელმწიფოს გვერდით და თავისი უკეთესი მომავლის გვერდით", — განაცხადა თალაკვაძემ.

მისივე თქმით, პარტიის მიზანია, რომ პირველივე ტურში ყველგან გაიმარჯვონ, თუმცა, თალაკვაძის განცხადებით, თუ ეს ასე არ მოხდება, მეორე ტურიც დემოკრატიული არჩევნების ნაწილია და ისინი მზად არიან, იბრძოლონ.

"ჩვენი მიზანი არის, რომ გავიმარჯვოთ დამაჯერებლად, გავიმარჯვოთ პირველ ტურში ყველგან, თუმცა მოგეხსენებათ, მეორე ტურიც ეს არის დემოკრატიული არჩევნების ნაწილი, შესაბამისად, თუ სადმე გამონაკლის შემთხვევებში ჩვენ დაგვჭირდება მეორე ტური, რა თქმა უნდა, მეორე ტურშიც სამართლიან ბრძოლაში ჩავერთვებით", — აღნიშნა მან.

დღეს, 31 ოქტომბერს, საქართველოს პარლამენტის არჩევნები იმართება. წელს პირველად, საარჩევნო სისტემა ყველაზე მეტად მიუახლოვდა სრულად პროპორციულს და არჩევნების 120/30 მანდატების თანაფარდობით ტარდება. აღნიშნული 8 მარტს ოპოზიციისა და მმართველ გუნდს შორის აშშ-ს ელჩის რეზიდენციაში გამართულ არაფორმალურ შეხვედრაზე გადაწყდა. იქვე, სამთავრობო გუნდი და ოპოზიცია ასევე, შეთანხმდა, რომ პარტია, რომელიც 40%-იან მხარდაჭერას ვერ მოიპოვებს, მთავრობის დაკომპლექტებას ვერ შეძლებს. რაც შეეხება ბარიერს, იგი — 1%-ია.