საერთაშორისო გამჭვირვალობა — საქართველოს ცნობით, 2020 წლის საპარლამენტო არჩევნებში მონაწილე 50 სუბიექტიდან, 29 მათგანმა ჯამში, 35 376 394 ლარის შემოწირულება მიიღო. TI-ის განცხადებით, შემოწირულებები 1 იანვირადნ 15 ოქტომრამდე შეისწავლეს და აქედან, მმართველმა პარტიამ 17 086 626 ლარი მოიზიდა. სხვა პარტიების შემოწირულებები კი, ასე გადანაწილდა:

  • ლელო — 5 075 844 ლარი;
  • ერთიანი ნაციონალური მოძრაობა — ძალა ერთობაშია — 3 735 583 ლარი;
  • ევროპული საქართველო — 2 793 574
  • სტრატეგია აღმაშენებლი — კანონი და სამართალი — 2 279 850
  • პატრიოტთა ალიანსი — 1 864 635

ფოტო: საერთაშორისო გამჭვირვალობა — საქართველო

ანგარიშის მიხედვით, ყველა საარჩევნო სუბიექტის ჯამური შემოწირულებების 48% მმართველმა პარტიამ მიიღო. TI-ის დაკვირვებით, 2016 წლის საპარლამენტო არჩევნების პერიოდში ქართული ოცნების წილი მთლიან შემოწირულებებში 66% იყო, 2017 წლის ადგილობრივი თვითმმართველობის არჩევნების დროს — 88%. ორგანიზაციის განცხადებით, პარტიების მიღებულ შემოწირულებებს შორის სხვაობის შემცირება ძირითადად იმან განაპირობა, რომ აქამდე არსებულ ფინანსურად ძლიერი პარტიების ტრადიციულ სიას დაემატა ახალი პარტია ლელო და საარჩევნო ბლოკი გიორგი ვაშაძე — სტრატეგია აღმაშენებელი.

ფოტო: TI

ამასთან, დოკუმენტის თანახმად, შემოწირულებების 98% ფიზიკური პირების მიერ არის განხორციელებული, იურიდიულის მიერ — 2. TI-ის ცნობითვე, ქართული პოლიტიკური პარტიების შემომწირველთა, დაახლოებით, 1⁄3-ს იმაზე მეტი აქვს შეწირული, ვიდრე ერთი წლის საშუალო დარიცხული ხელფასია (11 040 ლარი) საქართველოში. ასეთ შემომწირველებზე კი, ყველა პარტიის მიერ მიღებული შემოწირულების დაახლოებით 82% მოდის, რაც ორგანიზაციის თქმით, მათ მსხვილ დონორებზე დამოკიდებულებას მიუთითებს.

საერთაშორისო გამჭვირვალობა საქართველომ შუალედური ანგარიში 30 ოქტომბერს წარადგინა. TI-ის განცხადებით, საბოლოო ანგარიში არჩევნების შემდეგ გამოქვეყნდება.