ჯანდაცვის მინისტრის, ეკატერინე ტიკარაძის განცხადებით, Reuters-ის მიერ გავრცელებული ინფორმაცია, რომ ევროკავშირი საქართველოს უსაფრთხო მოგზაურობის ქვეყნების სიიდან ამოიღებს, დიდ მნიშვნელობას ვერ მიანიჭებს, რადგან ეს ცვლადი კომპონენტია.

"საქართველოს მოქალაქეს შეეზღუდება თუ არა მოგზაურობა, ამას კვლავ ევროკავშირი გადაწყვეტს, თუმცა, თუ ჩვენ დღევანდელი ჭრილით განვიხილავთ, იმ მდგომარეობას, რაც ევროკავშირშია, ვნახავთ, რომ ძალიან ბევრი ევროპული სახელმწიფო დღეს უკვე ლოქდაუნზე საუბრობს. აქედან გამომდინარე, მე ამ გადაწვეტილებას დიდ მნიშვნელობას ვერ მივანიჭებდი. ეს არის ცვლადი კომპონენტი. შეიძლება ხვალიდან კვლავ ამოღებული ვიყოთ იმ რისკქვეყნებიდან, რომელშიც ჩვენ დღეს და გუშინ ვიყავით შეტანილები", — განაცხადა ტიკარაძემ.

გუშინ, 22 ოქტომბერს Reuters-მა გაავრცელა ინფორმაცია, რომ კორონავირუსით ინფიცირებულთა რიცხვის მატების გამო ევროკავშირი საქართველოს უსაფრთხო მოგზაურობის ქვეყნების სიიდან ამოიღებს. მედია, ასევე, წერს, რომ, საქართველოსთან ერთად, მწვანე ზონის სტატუსს კანადა და ტუნისიც დაკარგავს. განახლებული სია ოფიციალურად კვირის ბოლომდე დამტკიცდება. Reuters-ის ცნობით, გადაწყვეტილება ევროკავშირის 27 ქვეყნის ელჩმა მიიღო.