ლელოს ინფორმაციით, პარტიის ლიდერების უდიდესმა ნაწილმა ჩაიტარა PCR ტესტი, პასუხების 99% უკვე ცნობილია და უარყოფითია. პარტიაში აღნიშნავენ, რომ კორონავირუსის პრევენციის მიზნით აგრძელებენ ოფისების დეზინფექციას, ხოლო ის თანამშრომლები, რომელთა სამსახურში ყოფნა არ არის სავალდებულო, დისტანციურ მუშაობაზე გადავიდნენ.

რაც შეეხება ლელოს ლიდერს, მამუკა ხაზარაძეს, რომელსაც კორონავირუსი დაუდასტურდა, პარტიაში ამბობენ, რომ ის კარგადაა და გუნდის სამუშაო განრიგში ონლაინ არის ჩართული. მათივე ინფორმაციით, ტესტირება ჩაუტარდათ ხაზარაძის ოჯახის წევრებსაც და მათი პასუხები უარყოფითია.

"ჩვენ ყოველდღიურად ვართ ველზე, შეუფერხებლად ვაგრძელებთ მუშაობას და ამომრჩეველთან კომუნიკაციას. მამუკა ხაზარაძეც თავს გრძნობს უკეთესად, აღარ აქვს სიცხე და ამიტომაც ყველა ფრონტზე, იქნება ეს ონლაინ, იქნება ეს ველზე, თუ ნებისმიერ სივრცეში, აქტიურად ვაგრძელებთ კომუნიკაციას ამომრჩეველთან 31 ოქტომბრამდე და ლელოს დამაჯერებელ გამარჯვებამდე", — აცხადებს მთაწმინდის მაჟორიტარობის კანდიდატი, საბა ბუაძე.

პარტიაში, ასევე, ამბობენ, რომ ატარებენ სახალხო კამპანიას და ამ რეჟიმის გამო, ყველა წევრი თითქმის ყოველ მეოთხე დღეს PCR ტესტირებას იტარებენ.

ინფორმაცია იმის შესახებ, რომ ლელოს ლიდერს, მამუკა ხაზარაძეს კორონავურუსი დაუდასტურდა, გუშინ, 18 ოქტომბერს გავრცელდა. ხაზარაძემ Facebook-ზე დაწერა, რომ წინ დღით დაბალი სიცხე ჰქონდა, ჩაიტარა PCR ტესტი და პასუხი დადებითი იყო.