საერთაშორისო გამჭვირვალობა — საქართველოს ინფორმაციით, პარტია მოქალაქეების მიერ დასახელებული 8 კანდიდატიდან ორი მათგანი დაკავშირებულია 4 კომპანიასთან, 6 კანდიდატი კი სამეწარმეო საქმიანობაში ჩართული არ არის.

ორგანიზაციამ კანდიდატების სამეწარმეო საქმიანობა და შემოწირულობები 2012 წლიდან 2020 წლის 13 ოქტომბრამდე შეისწავლა. დოკუმენტში აღნიშნულია, რომ ისინი მოკლებული არიან შესაძლებლობას, შეამოწმონ, არის თუ არა კვლევაში ნახსენები კომპანიები აქტიური, რადგან ამ მიზნისთვის საჭირო ინფორმაცია საგადასახადო საიდუმლოებაა.

ფოტო: modzraoba.ge

ლევან იოსელიანი, მთაწმინდა-კრწანისის მაჟორიტარობის კანდიდატი სპს ასლანიშვილი და იოსელიანის დამფუძნებელი და დირექტორია. მან 2020 წელს პარტიას ალეკო ელისაშვილი — მოქალაქეები 40 000 ლარი შესწირა.

ფოტო: Facebook

იოსებ კენჭაძე, ქუთაისის მაჟორიტარობის კანდიდატი წილებს 3 კომპანიაში ფლობს და დირექტორის პოზიციას იკავებს. კერძოდ, კენჭაძე შპს ლატონას 50%-ის მფლობელი/დირექტორი, შპს ამბრელა სერვის გრუპის 100%-ის მფლობელი/დირექტორი და შპს კ.პ.ს — კაპიტალის 100%-ის მფლობელი/დირექტორია.

ორგანიზაციის ცნობით, იოსებ კენჭაძის კომპანიამ შპს ამბრელა სერვის გრუპმა 2017-2018 წლებში 700 ლარის საერთო ღირებულების 2 მცირე გამარტივებული შესყიდვის კონტრაქტი მიიღო.

კანონმდებლობის თანახმად, პარლამენტის წევრს უფლება არ აქვს ეკავოს რაიმე თანამდებობა საჯარო სამსახურში ან ეწეოდეს სამეწარმეო საქმიანობას, თუმცა ის შეიძლება ფლობდეს აქციებს, წილს და სხვა ქონებას.

ასევე, პარლამენტის წევრს უფლება არ აქვს უშუალოდ განახორციელოს არაერთჯერადი საქმიანობა მოგების მიზნით მატერიალური ფასეულობებისა და ფინანსური საშუალებების სამართავად.

გაიგე მეტი: