საერთაშორისო გამჭვირვალობა — საქართველოს მიერ გამოქვეყნებული ანგარიშის მიხედვით, პოლიტიკურ პარტია გირჩის 6 მაჟორიტარი კანდიდატიდან, მხოლოდ ორი კანდიდატი არ არის ჩართული სამეწარმეო საქმიანობაში: ბორის (ჩელე) ყურუა და ნიკა მოსიაშვილი. დანარჩენი 4 კანდიდატი კი დაკავშირებულია 8 კომპანიასთან. მათ პოლიტიკური შემოწირულობის სახით პარტიისთვის გაღებული აქვთ 182 051 ლარი.

TI-მ კანდიდატების სამეწარმეო საქმიანობა და შემოწირულობები 2012 წლიდან 2020 წლის 13 ოქტომბრამდე შეისწავლა. დოკუმენტში აღნიშნულია, რომ ისინი მოკლებული არიან შესაძლებლობას, შეამოწმონ, არის თუ არა კვლევაში ნახსენები კომპანიები აქტიური, რადგან ამ მიზნისთვის საჭირო ინფორმაცია საგადასახადო საიდუმლოებაა.

ზურაბ გირჩი ჯაფარიძე დიდუბე-ჩუღურეთის მაჟორიტარობის კანდიდატია. ის ასევე არის შპს შმაქსის დირექტორი და 100%-ის მფლობელი. ის ფლობს შპს ჟურნალი მედიატორის 15%-ს. საერთო ჯამში, ანგარიშში ვკითხულობთ, რომ 2016 წელს მან გირჩს 5 000 ლარი შესწირა, 2015 წელს კი ერთიან ნაციონალურ მოძრაობას – 2 000 ლარი.

რაც შეეხება კიდევ ერთ მაჟორიტარობის კანდიდატს (ბათუმში), იაგო ხვიჩიას, ის არის შპს მანა ლეგალ კონსალტინგის დირექტორი და 20%-ის მფლობელი. ასევე, ის ფლობს შპს თბილისი ლიგალ კონსალტინგის 50%-ს და არის ამ კომპანიის დირექტორი.

ანგარიშის მიხედვით, იაგო ხვიჩიამ 2016-2017 წლებში გირჩს 29 650 ლარი შესწირა. გარდა ამისა, მისმა ბიზნესპარტნიორმა, შპს თბილისი ლიგალ კონსალტინგის 25%-ის მფლობელმა, იმედო არჯევანიძემ 2016 წელს 2 000 ლარი შესწირა გირჩს.

ვახტანგ მეგრელიშვილი თავად არ არის ჩართული სამეწარმეო საქმიანობაში. მისი მეუღლე მაია ჩარჩხალია არის შპს მეგაკოს დირექტორი და 100%-ის მფლობელი.

საერთაშორისო გამჭვირვალობა — საქართველოს განცხადებით, ვახტანგ მეგრელიშვილმა 2016-2019 წლებში გირჩს 145 401 ლარი შესწირა.

ანგარიშში ვკითხულობთ იმასაც, რომ ვახტანგ ზენაიშვილი და მისი მეუღლე ეკატერინე გავაშელაშვილი ინდივიდუალური მეწარმეები არიან. ვახტანგ ზენაიშვილი ასევე ფლობს 50%-იან წილს შპს თავთავში და არის ამ კომპანიის დირექტორი. ვახტანგ ზენაიშვილმა 2017 წელს ლანჩხუთის საკრებულოს ერთ-ერთ მაჟორიტარულ ოლქში საკუთარ კამპანიას 100 ლარი შესწირა.

კანონმდებლობის თანახმად, პარლამენტის წევრს უფლება არ აქვს ეკავოს რაიმე თანამდებობა საჯარო სამსახურში ან ეწეოდეს სამეწარმეო საქმიანობას, თუმცა ის შეიძლება ფლობდეს აქციებს, წილს და სხვა ქონებას. ასევე, პარლამენტის წევრს უფლება არ აქვს უშუალოდ განახორციელოს არაერთჯერადი საქმიანობა მოგების მიზნით მატერიალური ფასეულობებისა და ფინანსური საშუალებების სამართავად. გირჩის არც ერთი წევრი ამ ეტაპზე პარლამენტში არ არის.

ამავე თემაზე: