ლელოს ერთ-ერთი ლიდერი და საბურთალოს ოლქის მაჟორიტარი დეპუტატობის კანდიდატი, ბადრი ჯაფარიძე აცხადებს, რომ პემიერმინისტრი გიორგი გახარია ქმნის პანიკას, რითაც ცდილობს საზოგადოება დააფრთხოს და ადამიანები არჩევნებზე არ მივიდნენ.

"პრემიერმინისტრი, ერთი მხრივ, ამბობს, რომ არ გადაიდება არჩევნები. მეორე მხრივ, ქმნის მორიგ პანიკას, რომ იქნება ინფიცირების მზარდი რაოდენობა. ადამიანები ამ განცხადებამ, შესაძლოა, დააფრთხოს და არ მივიდნენ არჩევნებზე.

31 ოქტომბერს არჩევნებზე ადამიანების მაქსიმალური მონაწილეობა არის ერთ-ერთი მთავარი ნაბიჯი და შესაძლებლობა, გამოვიყვანოთ ქვეყანა ჩიხიდან, რომელშიც ქართულმა ოცნებამ შეიყვანა. 15 დღეში ქვეყანამ უნდა გააკეთოს არჩევანი, რომელიც დინამიური ცვლილებების შესაძლებლობას მოგვცემს", — ამბობს ჯაფარიძე.

მაჟორიტარობის კანდიდატმა, ასევე, ისაუბრა არსებულ ეპიდსიტუაციაზე და აღნიშნა, რომ ახლა ნებისმიერი შეზღუდვა ქვეყნის ეკონომიკისთვის დამანგრეველი იქნება.

"ჩვენი პოზიცია არის ნათელი — მთავრობამ კიდევ ერთხელ დაადასტურა მისი უუნარობა და არაპროფესიონალიზმი პანდემიასთან გამკლავების პროცესში, როდესაც სრულიად არაადეკვატურად, კოვიდის 15-20 შემთხვევის დროს, შემოიღო დრაკონული ზომები და უზარმაზარი ზიანი მიაყენა ჩვენს ეკონომიკას. ახლა, როდესაც გვაქვს 900 შემთხვევა, ნებისმიერი შეზღუდვა იქნება ეკონომიკის სრული კრახი.

ახლა მთავარია, ჩვენს მოსახლეობას ვუთხრათ, რომ ყველანი უნდა მოვიდეთ 31 ოქტომბერს არჩევნებზე. აუცილებელია, ყველა რეკომენდაცია იყოს გათვალისწინებული, ამ შემთხვევაში დაინფიცირების რისკი მინუმამდე იქნება დაყვანილი. მთავარია გვესმოდეს, რომ თუ ვინმეს არ აწყობს მოსახლეობის მისვლა არჩევნებზე ეს არის ქართული ოცნება, მისი სპიკერები და ლიდერები. ნათელია, რომ მოსახლეობას გადაწყვეტილება მიღებული აქვს - „ქართული ოცნება” დამარცხდება. მთავარი არის ის, რომ არ დაშინდეს მოსახლეობა პრემიერ-მინისტრის იმ ტიპის განცხადებებით, რომ იქნება მზარდი შემთხვევები და ამ დროს ჩვენ არ გადავდებთ არჩევნებს. ჩვენ ამას მაქსიმალურად უნდა დავუპირისპიროთ სიფრთხილე. დავიცვათ ყველა ის აუცილებელი ზომა, რომელსაც ჩვენ მედიკოსები გვეუბნებიან იმისათვის, რომ გარანტირებული იყოს ადამიანების უსაფრთხოება. 31 ოქტომბერს ყველანი უნდა გამოვცხადდეთ არჩევნებზე, რომ ჩვენ დავიწყოთ იმ ვარდნის შეჩერება, რომელშიც შეგვიყვანა ქართულმა ოცნებამ", — განაცხადა ბადრი ჯაფარიძემ.