ევროკავშირის 27-მა ქვეყანამ განაცხადა, რომ შესაძლოა, ლუკაშენკოს პერსონალური სანქციები დაუწესონ. ამის შესახებ ინფორმაცია გამოცემა BBC-მ გამოაქვეყნა.

ამავე დროს, ევროპის საგარეო საქმეთა მინისტრებს ჯერ არ დაუჭერიათ გერმანიის წინადადებისთვის მხარი, რომელიც ლუკაშენკოს წინააღმდე სანქციებს დაუყოვნებლივ მოითხოვდა.

ევროკავშირს ლუკაშენკოსთან დაკავშირებით საბოლოო გადაწყვეტილება არ მიუღია, რადგან იმედი აქვს, რომ მას ოპოზიციურ ძალებთან დიალოგის აუცილებლობაში დაარწმუნებს.

ამ დროისთვის მინისტრთა განცხადებაში ნათქვამია, რომ ევროკავშირი "მკაცრად გმობს ბელარუსის ხელისუფლების მიერ განხორციელებულ ძალადობრივ ქმედებას და მზად არის, შემზღდველი ზომები მიიღოს სხვადასხვა სტრუქტურებისა და მაღალჩინოსნების წინააღმდეგ ლუკაშენსკოს ჩათვლით".

გერმანიის საგარეო საქმეთა მინისტრმა, ჰეიკო მაასმა განაცხადა, რომ ლუკაშენკოს წინააღმდეგ სანქციები უკვე უნდა დაწესებულიყო, როცა კვირას დემონსტრანტების წინააღმდეგ წყლის ჭავლი გამოიყენა და ასობით ადამიანი დააკავა.

პოლიტიკური დაძაბულობა ბელარუსში ისევ გრძელდება. 9 აგვისტოს ჩატარებულ საპრეზიდენტო არჩევნების შედეგებს მოსახლეობა არ აღიარებს. დემონსტრანტები პრეზიდენტ ალექსანდრ ლუკაშენკოს გადადგომასა და ხელახალი არჩევნების ჩატარებას მოითხოვენ. ადგილობრივი საარჩევნო კომისიის მიერ გამოქვეყნებულ არჩევნების შედეგებს გაერთიანებული ოპოზიციის კანდიდატი, სვეტლანა ტიხანოვსკაიაც არ ეთანხმება, რომელიც შედეგების გამოცხადების შემდეგ იძულებული გახდა, ქვეყანა დაეტოვებინა. მისი ინიციატივით, ძალაუფლების მშვიდობიანი გადაბარებისთვის საკოორდინაციო საბჭო შეიქმნა.

ევროპარლამენტმა ბელარუსში აგვისტოში ჩატარებულ არჩევნებს გაყალბებული უწოდა და არ აღიარა. ევროპარლამენტის თქმით, ლუკაშენკოს 5 ნოემბრიდან, როცა მისი უფლებამოსილების ვადა ამოიწურება, პრეზიდენტად აღარ აღიარებენ.