ევროპული საქართველოს ერთ-ერთი ლიდერი, სერგი კაპანაძე აზერბაიჯანთან საზღვრის დემარკაციასთან დაკავშირებით მელაშვილისა და ილიჩოვას დაკავებას გამოეხმაურა. კაპანაძემ აღნიშნა, ხელისუფლებამ კიდევ ერთხელ აჩვენა, რომ შეუძლიათ, ითანამშრომლონ რუსეთთან, ისეთ ძალებთან, რომელთა ინტერესიც არის საქართველოსთვის პრობლემების შექმნა და რუსეთის გაძლიერება საქართველოში.

"ჩვენ კარგად ვიცით, რომ ეს თემა თავიდან დაძრა პატრიოტთა ალიანსმა. ეს არის გამოძიება, რომელიც ეფუძნება რუსეთიდან მიღებულ სრულიად გაუგებარ მასალებს, რომელთაც არანაირი იურიდიული შინაარსი არ გააჩნია და რის გამოც ადამიანის დაპატიმრება არის აბსოლუტურად წარმოუდგენელი. ეს გადაწყვეტილება არის ძალიან დიდი დარტყმა არამარტო ამ ადამიანების პრესტიჟზე, არამედ მთლიანად საგარეო საქმეთა სამინისტროს რეპუტაციაზე და ქვეყნის ეროვნულ ინტერესებზე", — განაცხადა სერგი კაპანაძემ.

კაპანაძემ აღნიშნა, რომ ეს არის პოლიტიკური მოტივი და ამ ორი ქვეყნის მოყვარული ადამიანის დაჭერა არჩევნების შემდეგ უნდა გამოიძიონ და დაისაჯოს ყველა, ვინც ამ უკანონო გადაწყვეტილებაში მონაწილეობა მიიღო.

„ივერი მელაშვილი და ნატალია ილიჩოვა დატოვეს საპატიმროში ისეთი აბსურდული ბრალდებით, რომელსაც არ გააჩნია, არათუ იურიდიული შინაარსი, არამედ არანაირი მორალური ასპექტი საერთოდ. დატოვეს პატიმრობაში ერთადერთი მოტივით, რომ თავისი პოლიტიკური მიზნები მოიყვანოს სისრულეში და ისევ და ისევ, წინასაარჩევნოდ, გაუგებარი რამ დააბრალოს წინა ხელისუფლებას", — აღნიშნა სერგი კაპანაძემ.

აზერბაიჯანთან საზღვრის დადგენის საქმეზე დაკავებულ ივერი მელაშვილსა და ნატალია ილიჩოვას აღკვეთის ღონისძიების სახით სასამართლომ პატიმრობა შეუფარდა.

ნატალია ილიჩოვას ადვოკატმა გირაოს სახით სასამართლოს 20 000 ლარი შესთავაზა, ხოლო ივერი მელაშვილის ადვოკატი მისი დაცვის ქვეშ მყოფის აღკვეთის ღონისძიების გარეშე დატოვებას ითხოვდა. რაც შეეხება ბრალდების მხარეს, იგი დაკავებულების მიმართ პატიმრობის გამოყენებას მოითხოვდა.

საქართველო-აზერბაიჯანის დელიმიტაცია-დემარკაციის კომისიის წევრების, ივერი მელაშვილისა და ნატალია ილიჩოვას მიმართ სისხლის სამართლებრივი დევნა 7 ოქტომბერს დაიწყო.

დაკავებულებს ბრალი სისხლის სამართლის კოდექსის 308-ე მუხლის პირველი ნაწილით წარედგინათ, რაც გულისხმობს საქართველოს საწინააღმდეგო მოქმედებას, რომელიც მიმართული უცხო ქვეყნისათვის საქართველოს მთელი ტერიტორიის ან მისი ნაწილის გადაცემისკენ ანდა საქართველოს ტერიტორიიდან მისი ნაწილის გამოყოფისკენ.

მელაშვილი საგარეო საქმეთა სამინისტროს მეზობელი ქვეყნების დეპარტამენტის სასაზღვრო ურთიერთობათა სამსახურის უფროსია, ხოლო ილიჩოვა შს სამინისტროს სასაზღვრო პოლიციის სახმელეთო საზღვრის დაცვის დეპარტამენტის მთავარი ინსპექტორია. ორივეს მიმართ პროკურატურა პატიმრობის შეფარდებას მოითხოვს.

მიმდინარე წლის 17 აგვისტოს საქართველოს გენერალურ პროკურატურაში გამოძიება დაიწყო, რომელიც უცხო ქვეყნისათვის საქართველოს ტერიტორიის ნაწილის გადაცემისკენ მიმართული მოქმედების განხორციელების საქმეს ეხებოდა. როგორც უწყებაში ამბობენ, საქართველოს საზიანოდ მეზობელ ქვეყანას 3 500-მდე ჰა ფართობი მიწის გადაცემის საფრთხე შეიქმნა.

საქმის აღძვრის შემდეგ საგამოძიებო ორგანოებმა მელაშვილისა და ილიჩოვას სახლები და სამუშაო ოფისები გაჩხრიკეს. ორივე მათგანი გამოძიების დაწყებას პოლიტიკას და არჩევნებს უკავშირდება.