ინგლისში, ლინკოლშირის საგრაფოს ზოოპარკში ახალმიყვანილი ხუთი თუთიყუში უჩვეულო მიზეზის გამო დაისაჯა: ისინი მეტისმეტად ბევრს იგინებოდნენ.

გარეული ცხოველების ეს ცნობილი პარკი 2003 წლიდან ფუნქციონირებს და იქ 1 500-ზე მეტი თუთიყუში ცხოვრობს, თუმცა ისეთი ამბავი, როგორც გასულ აგვისტოს დაბინავებულმა ახალმა თუთიყუშებმა დაატრიალეს, იშვიათად ახსოვთ.

როგორც ამ დაწესებულების ხელმძღვანელმა, სტივ ნიკოლსმა განაცხადა, ისე მოხდა, რომ ხუთივე ახალი ფრინველი ერთ გალიაში მოათავსეს, მათ კი მოწყენილობის მოსაკლავად ცოდნის გაზიარება გადაწყვიტეს და აღმოჩნდა, რომ ყველას სალანძღავი სიტყვების დიდი მარაგი ჰქონდა.

მათ ამ უჩვეულო "საუბრებს" ზოოპარკის თანამშრომლები, ცხადია, სიცილით შეხვდნენ, რამაც ისინი კიდევ უფრო წაახალისა, რომ აქტიურად ელანძღათ ყველა უმისამართოდ.

"მრავალი წლის განმავლობაში ყოველთვის გვქონდა თუთიყუშებთან ურთიერთობა და მათი უმეტესობა უწმაწური სიტყვების მცირე ნაწილს მაინც იყენებს, რაც ჩვენთვის ნაცნობია. მაშინაც და ახლაც, როცა ისინი ჩვენ გვაგინებენ, რა თქმა უნდა, გვეცინება. სიცილი კი მათ კიდევ უფრო ახალისებს, რომ გინება არ შეწყვიტონ", — აცხადებს ზოოპარკის ხელმძღვანელი სტივ ნიკოლსი.

აფრიკული ნაცრისფერი თუთიყუში, იგივე ჟაკო.

ფოტო: WikiMedia / L.Miguel Bugallo Sánchez

მართალია, თუთუყუშების გინება უცხო არავისთვისაა, მეტიც, სახალისოც კია, თუმცა, როგორც ნიკოლსი აღნიშნავს, ერთ გალიაში ხუთი თუთიყუშის ერთდროული გინება "მოხუცი მუშების კლუბს დაემსგავსა, სადაც მხოლოდ იგინებიან და იცინიან".

სწორედ ამის გამო მოუწიათ, ისინი იზოლირებულ გალიებში გადაეყვანათ:

"თანამშრომლები გავმხიარულდით, არც დამთვალიერებლებს ჰქონდათ მათთან პრობლემა, მაგრამ იმაზე ვდარდობდით, რომ შაბათი-კვირა ახლოვდებოდა და ბავშვები გვეწვეოდნენ", — აღნიშნა სტივ ნიკოლმა ფრინველების "დასჯის" მიზეზზე საუბრისას.

ამ გზით ზოოპარკის ხელმძღვანელებს იმედი აქვთ, რომ თუთიყუშები ამ "მავნე ჩვევას" გადაეჩვევიან.

"ისინი აფრიკული ნაცრისფერი თუთიყუშები არიან, რომლებიც ძალიან, ძალიან კარგად ბაძავენ ნებისმიერ ხმას და ვიმედოვნებთ, რომ განცალკევებით ყოფნისას სხვა თუთიყუშის ხმებს აითვისებენ, თუ არადა, მოგვიწევს, ცალ-ცალკე სივრცეებში დავაბრუნოთ: ხუთივეს ერთიანი გინების მოსმენას მაინც აჯობებს" — ამბობს ნიკოლსი.

ამის მიუხედავად, ზოოპარკის დირექტორი აღნიშნავს, რომ გინების მოყვარული თუთიყუშები ბიზნესისთვის მაინც მომგებიანები არიან, რადგან მათი ხილვა და მოსმენა, როგორც წესი, ყველას ამხიარულებს.