ჩეჩენი ბიზნესმენისა და პოლიტიკოსის, უმარ ჯაბრაილოვის ფოტო იმ მასალებში აღმოაჩინეს, რომლებიც აშშ-ის იუსტიციის დეპარტამენტმა გარდაცვლილი ამერიკელი ფინანსისტის, ჯეფრი ეპსტეინის საქმეზე მიმდინარე გამოძიების ფარგლებში ცოტა ხნის წინ გაასაჯაროვა, — ამის შესახებ რუსული ტელეგრამ-არხი BAZA იტყობინება.

ეპსტეინი აშშ-ში ფედერალური გამოძიების ობიექტი არასრულწლოვანთა მიმართ სექსუალური დანაშაულებისა და გოგონების ექსპლუატაციის ბრალდებების გამო გახდა. ცოტა ხნის წინ, აშშ-ის მთავრობამ ამ საქმის მასალების გამოქვეყნება კონგრესის მიერ მიღებული კანონის საფუძველზე დაიწყო, რომელიც ეპსტეინის ფაილების გამჭვირვალობას ითვალისწინებს.

ჯაბრაილოვმა ჟურნალისტებს დაუდასტურა, რომ ეპსტეინს იცნობდა, თუმცა აღნიშნა, რომ მასთან არც კომუნიკაცია ჰქონია და არც მეგობრული ურთიერთობა. მისი თქმით, გამოქვეყნებულ დოკუმენტებში ნაპოვნი ფოტო, რომელზეც ის ეპსტეინთან ერთად არის გამოსახული, სავარაუდოდ 1990 წელს კარატეს ვარჯიშების დროს იყო გადაღებული. ჯაბრაილოვის განცხადებით, მას არ ახსოვს არც ფოტოს ზუსტი წარმოშობა და არც ადგილი, სადაც ის იყო გადაღებული.

ჯაბრაილოვი 1958 წელს გროზნოში დაიბადა და რუსეთში ცნობილია, როგორც ბიზნესმენი და პოლიტიკური ფიგურა, ჩეჩნეთის ყოფილი წარმომადგენელი რუსეთის ფედერალური კრების ფედერაციის საბჭოში, ასევე ფილანთროპი და საზოგადო მოღვაწე. 2000 წელს ის რუსეთის პრეზიდენტობის კანდიდატი გახდა, მაგრამ ხმების მხოლოდ 0,1% მიიღო.

2017 წელს ჯაბრაილოვი დიდ სკანდალში გაეხვა, როდესაც მოსკოვის კრემლთან მდებარე Four Seasons-ის სასტუმროს ლუქს-ნომერში პისტოლეტით ცეცხლი უმისამართოდ გახსნა — კედლებსა და ჭერს ესროდა. სროლა, სავარაუდოდ, სასტუმროს მომსახურებით უკმაყოფილებამ გამოიწვია. ბიზნესმენმა ნომერში საკვები შეუკვეთა, თუმცა ის მიმტანის ნაცვლად დამლაგებელმა მოიტანა სპეციალური ეტლით, რამაც, გავრცელებული ინფორმაციით, მილიონერი გააღიზიანა. ამის შემდეგ მან ჭერის მიმართულებით სროლა დაიწყო და ადმინისტრაციის გამოძახება მოითხოვა. ჯაბრაილოვს 500 000 რუბლის (დაახლოებით 6 300 დოლარის) ოდენობის ჯარიმა დაეკისრა.

ეპსტეინის საქმის მასალები აშშ-ის იუსტიციის დეპარტამენტმა ნაწილობრივ 2025 წლის 19 დეკემბერს გამოაქვეყნა, იმ ახალი კანონის მოთხოვნების შესაბამისად, რომელიც მიმდინარე წლის ნოემბერში მიიღეს. კანონი მთავრობას ავალდებულებს გაასაჯაროოს ეპსტაენისა და მისი ქსელის შესახებ გამოძიებებთან დაკავშირებული მანამდე გასაიდუმლოებული ან შეზღუდული წვდომის მქონე მასალები. გამოქვეყნებული მასალები ათიათასობით ფაილს მოიცავს, მათ შორის სასამართლო დოკუმენტებს, ფოტოებს, ფრენების შესახე ინფორმაციას და საკონტაქტო ჩანაწერებს, თუმცა მრავალი დოკუმენტი კვლავ არაა ხელმისაწვდომი ან მნიშვნელოვნადაა რედაქტირებული. ხელისუფლების განმარტებით, ეს დაზარალებულთა პერსონალური მონაცემების და სამართლებრივი პროცედურების დასაცავად აუცილებელია.

გამოქვეყნებულ მასალებში მოხვდა როგორც საარქივო ფოტოები, ისე ჩანაწერები, რომლებშიც ნახსენებია მაღალი პროფილის მქონე პირები და ცნობილი სახეები, მათ შორის ყოფილი პოლიტიკური ლიდერები და კულტურის სფეროს წარმომადგენლები — აშშ-ის ყოფილი პრეზიდენტი ბილ კლინტონი, მუსიკოსი მაიკლ ჯექსონი, ჯგუფ Rolling Stones-ის სოლისტი მიკ ჯაგერი და მომღერალი და მსახიობი დაიანა როსი.

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.