შინაგან საქმეთა სამინისტროში აცხადებენ, რომ საარჩევნო დარღვევების დროს მტკიცებულებების საფუძველზე, ყოველთვის დგებოდა კონკრეტული პირების პასუხისმგებლობის საკითხი, მათ შორის წინა არჩევნებზეც.

"მაგალითისთვის 2018 წლის საპრეზიდენტო არჩევნების წინასაარჩევნო პერიოდში, ასევე, პირველი და მეორე ტურების განმავლობაში და შემდგომ პერიოდში, გამოძიება დაიწყო 70-ზე მეტ სისხლის სამართლის საქმეზე, საიდანაც სისხლისსამართლებრივი პასუხისგებლობა დაეკისრა 27 პირს", — აცხადებენ შსს-ში.

მათივე განცხადების მიხედვით, სამინისტრო მყისიერ სამართლებრივ რეაგირებას ახდენდა თითოეულ ინციდენტზე, რომელიც მტკიცებულებებით იყო გამყარებული და ამისთვის აქტიურად თანამშრომლობდა ცენტრალურ საარჩევნო კომისიასთანაც.

უწყებაში ამბობენ, რომ სამინისტრო, როგორც "პოლიტიკურად ნეიტრალური უწყება", მოწოდებულია, 2020 წლის არჩევნების უსაფრთხო და თავისუფალ გარემოში ჩატარება უზრუნველყოს, რისთვისაც ყველა მხარესთან ითანამშრომლებს.

შინაგან საქმეთა სამინისტოში, ასევე, ავრცელებს ინფორმაციას, რომ აქვთ დაგეგმილი კონკრეტული ღონისძებები, რათა საპარლამენტო არჩევნები ჩატარდეს მშვიდ გარემოში.

შინაგან საქმეთა სამინისტრო ამ განცხადებით ეხმიანება სახალხო დამცველის, ნინო ლომჯარიას განცხადებას, რომლის მიხედვითად წინასაარჩევნოდ უკვე დაფიქსირდა ძალისმიერი ანგარიშსწორების ფაქტები, პოლიტიკური ოპონენტების წინააღმდეგ და პირადი ცხოვრების გამოყენებით ადამიანების დაშინებაც ხდება. როგორც ლომჯარიამ ჟურნალისტებთან აღნიშნა, წინა წლების პრაქტიკა აჩვენებს, რომ საარჩევნოდ გამოვლენილი ძალადობრივი ქმედებების გამო არავინ დასჯილა.