ლას-ვეგასში მდებარე ყველა ობიექტი, მათ შორის სამთავრობო შენობები და ქუჩის განათებები, უკვე სრულად მარაგდება განახლებადი ენერგიით. ინფორმაციას ქალაქის ოფიციალურ პირებზე დაყრდნობით ჰაფინგტონპოსტი ავრცელებს.

"შეგვიძლია დავიკვეხნოთ, რომ ეს ქალაქი, ქალაქი ლას-ვეგასი, მთელს მსოფლიოში იმ რამდენიმე ქალაქის რიცხვში შედის, რომლებიც მთელ ენერგიას ბუნების წყაროებიდან იღებენ" - განაცხადა ლას-ვეგასის მერმა კაროლაინ გუდმენმა ახალი ამბების კონფერენციაზე.

ეს მიღწევა ნიშნავს, რომ პროექტი, რომელიც ქალაქის მხოლოდ რეგენერაციული ენერგიით მომარაგებას გულისხმობდა და თითქმის 10 წელი მიმდინარეობდა, განხორციელდა.

ჰაფინგტონპოსტის ცნობით, ჯერჯერობით ყველა საცხოვრებელი და კომერციული დაწესებულება სრულად არ გადასულა განახლებადი ენერგიის მოხმარებაზე.

ნოემბერში ამერიკის 48 ქალაქის მერმა მიმართა პრეზიდენტად არჩეულ დონალდ ტრამპს, კლიმატის ცვლილებები რეალურ გამოწვევად განეხილა.

განახლებად ენერგიას მსოფლიოს სხვადასხვა კუთხეში მიმართავენ. მაგალითად, მას შემდეგ რაც ინდოეთი ეკოლოგიური კატასტროფის წინაშე დადგა, ქვეყანამ საჯარო დაწესებულებების მზის ენერგიით მომარაგებას გადაწყვიტა.

2017 წლიდან განახლებად ენერგიაზე სრულად გადადის Google.

წელს შოტლანდიის ქარის ტურბინებმა ერთი დღით სრულად უზრუნველყო ელექტროენერგიის მოხმარება. პორტუგალია უფრო შორს წავიდა. 4 დღის განმავლობაში, ქვეყანა მხოლოდ განახლებად ენერგიას იყენებდა.