დაავადებათა კონტროლის ცენტრის ცხელი ხაზი 116 001
ჯანდაცვის სამინისტროს ცხელი ხაზი 15 05
მთავრობის ცხელი ხაზი 144

დაავადებათა კონტროლის ცენტრის ხელმძღვანელი, ამირან გამყრელიძე ამბობს, რომ ქვეყანაში მკაცრი იზოლაციის გამოცხადება არ იგეგმება, თუმცა ლოკალური ჩაკეტვები შესაძლებელია იყოს. ამის შესახებ მან მთავრობის სხდომის დასრულების შემდეგ ისაუბრა.

"შეკავების ის პრინციპები, რომელიც გაზაფხულზე განხორციელდა, მკაცრი ე.წ. ლოქდაუნები და ჩაკეტვები, რა თქმა უნდა, ეს მთელი ქვეყნის მასშტაბით ვერ განხორციელდება და არ განხორციელდება, მაგრამ ე.წ. წერტილოვანი დარტყმები შესაძლებელია იყო, თუ გვექნება ასეთი კლასტერები", — აღნიშნა მან.

მისივე თქმით, იმისათვის, რომ მკაცრი ზომების მიღება არ გახდეს საჭირო, მოსახლეობამ რეკომენდაციები უნდა გაითვალისწინოს. ამასთან, გამყრელიძე ამბობს, რომ დინამიური ზრდის მიუხედავად, სიტუაცია მართვადია.

10 სექტემბრის მონაცემებით, საქართველოში კორონავირუსის 57 ახალი შემთხვევა გამოვლინდა, გამოჯანმრთელდა 9 პაციენტი, მონაცემები StopCov-ზე განახლდა.

ინფექციური საავადმყოფოს სამედიცინო დირექტორის, მარინა ეზუგბაიას თქმით, 57 ახალი შემთხვევიდან 5 დონასთან არის დაკავშირებული, 15 ბათუმთან, 18 დადასტურებულ შემთხვევათა კონტაქტებია, 4 აჭარაში მოგზაურობის ისტორიის მქონე პირია, 3 შემოტანილი შემთხვევაა, 5 სამედიცინო პერსონალია და რვა პაციენტზე წყაროს ეძებენ.

ჯამში, საქართველოში კორონავირუსის დადასტურებულ შემთხვევათა რაოდენობა 1 830-მდე გაიზარდა, ამათგან 1 334 უკვე გამოჯანმრთელდა, 19 კი გარდაიცვალა. კარანტინის რეჟიმში იმყოფება 5 882, სტაციონარში მეთვალყურეობის ქვეშ კი — 390.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: