დაავადებათა კონტროლის ცენტრის ცხელი ხაზი 116 001
ჯანდაცვის სამინისტროს ცხელი ხაზი 15 05
მთავრობის ცხელი ხაზი 144

აჭარის საზოგადოებრივი ჯანდაცვის ცენტრის ხელმძღვანელის, რუსუდან შავიშვილის განცხადებით, აჭარის ავტონომიური რესპუბლიკის ჯანდაცვის მინისტრის, ნინო ნიჟარაძის ძმას კორონავირუსი დაუდასტურდა. მისივე თქმით, მინისტრს ინფიცირებულთან კონტაქტი არ ჰქონია.

"არანაირი შეხება არ ჰქონდა მინისტრს 2 კვირით ადრე, მისი სამსახურებრივი დაკავებულობიდან გამომდინარე. თავდაპირველად იყო კვლევაში და იყო უარყოფითი. განმეორებითი კვლევით დადგინდა და ისიც არის სტაციონარში", — განუცხადა მან ჟურნალისტებს.

შავიშვილის თქმით, 3 ახალი შემთხვევა ე.წ. ხოფის კლასტერია, 2-ის წყარო უცნობია, 1 იუსტიციის სახლის თანამშრომელია, დანარჩენი კი უკვე დადასტურებული შემთხვევების კონტაქტებია. მისივე თქმით, შემთხვევების უმეტესობა ასიმპტომურია და მძიმე პაციენტები არ ჰყავთ.

ინფექციური საავადმყოფოს სამედიცინო დირექტორის, მარინა ეზუგბაიას თქმით, აჭარის რეგიონში მდგომარეობა სერიოზულია და იგი უკვე წითელ ზონადაა გამოცხადებული. მისივე განცხადებით, იქ, ალბათ, დამატებითი ღონისიებების გატარება იქნება საჭირო.

8 სექტემბრის მონაცემებით, საქართველოში კორონავირუსის 45 ახალი შემთხვევა გამოვლინდა, 6 ადამიანი გამოჯანმრთელდა. მათგან, 23 შემთხვევა აჭარაში გამოვლინდა, 5 კი თბილისში ფართომასშტაბიან ქორწილს უკავშირდება.

"3 უკავშირდება დონას კლასტერს, 19 არის დადასტურებულ შემთხვევებთან კონტაქტი, 4 სამედიცინო პერსონალი ავერსის კლინიკიდან, 4 შემოტანილი, მათგან 1 სატვირთო ავტომობილის მძღოლია, 12 არის მოგზაურობის ისტორიით აჭარაში, 3-ზე მიმდინარეობს ეპიდკვლევა წყაროებისა და კონტაქტების დადგენის მიზნით", — აღნიშნა ეზუგბაიამ.

ჯამში, საქართველოში კორონავირუსის დადასტურებულ შემთხვევათა რაოდენობა 1 729-მდე გაიზარდა, ამათგან 1 321 უკვე გამოჯანმრთელდა, 19 კი გარდაიცვალა. კარანტინის რეჟიმში იმყოფება 5 882, სტაციონარში მეთვალყურეობის ქვეშ კი — 390.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: