დაავადებათა კონტროლის ცენტრის ცხელი ხაზი 116 001
ჯანდაცვის სამინისტროს ცხელი ხაზი 15 05
მთავრობის ცხელი ხაზი 144

მაღაზიათა ქსელი ნავნე ადასტურებს ინფორმაციას, რომ გუშინ, 2 სექტემბერს თბილისის საწყობის მათ ერთ-ერთ თანამშრომელს კორონავირუსი დაუდასტურდა. ამის შესახებ მათ ფეისბუქზე გაავრცელეს განცხადება.

მათი ინფორმაციით, აღნიშნული თანამშრომელი 17 აგვისტოს შემდგომ შვებულებაში იმყოფებოდა და ამ დროის განმავლობაში, მას შეხება არ ჰქონია არცერთ თანამშრომელთან.

"მისი კონტაქტები უკვე გამოვლენილია, თუმცა, ნავნე გადასამოწმებელი კონტაქტების სიაში არ შედის. ნავნეს არცერთი ფილიალის თანამშრომელი, არც ინფიცირებულთა და არც სავარაუდო კონტაქტების სიაში არ იმყოფება", — ვკითხულობთ განცხადებაში.

მათი თქმით, მიუხედავად იმისა, თანამშრომელი ორ კვირაზე მეტია სამსახურში არ ყოფილა, საწყობის ტერიტორიას უკვე ჩაუტარდა სადეზინფექციო სამუშაოები.

3 სექტემბრის მონაცემებით, საქართველოში კორონავირუსის 20 ახალი შემთხვევა გამოვლინდა, გამოჯანმრთელებულთა რიცხვი კი 9-ით გაიზარდა. მონაცემები StopCov-ზე განახლდა.

თბილისის ინფექციური საავადმყოფოს სამედიცინო დირექტორის, მარინა ეზუგბაიას ცნობით, 3 სექტემბერს დადასტურებული 20 ახალი შემთხვევიდან 8 პაციენტი არის დადასტურებულ პირთან კონტაქტი, 1 — სამედიცინო პერსონალი, 7 შემთხვევა შემოტანილია, რომელთაგან 4 სატვირთოს მძღოლია, ხოლო 4 პაციენტზე მიმდინარეობს ეპიდკვლევა წყაროს დადგენის მიზნით.

ჯამში, საქართველოში კორონავირუსის დადასტურებულ შემთხვევათა რაოდენობა 1 568-მდე გაიზარდა, გამოჯანმრთელებულია 1 279 ადამიანი, გარდაცვლილი კი — 19. კარანტინის რეჟიმში რჩება 6 185 პირი, სტაციონარში მეთვალყურეობის ქვეშ კი 239 პაციენტია.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: