ბელარუსის პრეზიდენტი ალექსანდრ ლუკაშენკო ამტკიცებს, რომ ბელარუსში განვითარებული მოვლენები აშშ-ს მიერ იმართება. BELTA-ს ინფორმაციით, ამის შესახებ მან აგროკომბინატ ძერჟინსკის მომსახურე პერსონალთან საუბრის დროს განაცხადა.

"ისინი ქმნიდნენ ამ არეულობას. რუსეთს ჩვენი დაკარგვის ეშინოდა. დასავლეთმა გადაწყვიტა, რუსეთის წინააღმდეგ გამოვეყენებინეთ, როგორც ახლა ჩანს. მათ სურთ ბალტია-შავი ზღვის დერეფანი ჩამოაყალიბონ — ბალტიისპირეთის სამი ქვეყანა, ჩვენ და უკრაინა", — განაცხადა ლუკაშენკომ.

მისივე თქმით, ამერიკა ევროპასთან ერთად გეგმავს და მართავს ბელარუსის საპროტესტო გამოსვლებს. ლუკაშენკოს თქმით, ვარშავის მახლობლად სპეციალური ცენტრი შეიქმნა და კარგად იცის, რასაც აკეთებენ იქ. მისი თქმით, მათი ტანკები მზადყოფნაშია.

"დიქტატორო წადი" — რა ხდება ბელარუსში

ბელარუსში მასობრივი საპროტესტო აქციები 9 აგვისტოდან მიმდინარეობს, რისი მიზეზიც საპრეზიდენტო არჩევნების შედეგები გახდა. არჩევნებზე მთავარი კონკურენტები სვეტლანა ტიხანოვსკაია და მოქმედი პრეზიდენტი ალექსანდრ ლუკაშენკო იყვნენ.

ცენტრალური საარჩევნო კომისიის თანახმად, ლუკაშენკომ ხმების 80% აიღო, ტიხანოვსკაიამ — 10%.

შედეგებს მოსახლეობის დიდი ნაწილი და ოპოზიცია არ აღიარებს და ლუკაშენკოს გაყალბებაში ადანაშაულებს. არჩევნების შედეგები არ აღიარა აშშ-მ, ირლანდიამ, კანადამ და ევროკავშირმა. ამავდროულად, ევროკავშირმა ლუკაშენკოს რეჟიმს სანქციები დაუწესა.

პრეზიდენტის არჩევასთან დაკავშირებული პროცედურის გამო გადადგა ბელარუსის მთავრობა, სამოქალაქო საზოგადოება კი "დიქტატორის" გადადგომას ითხოვს, თუმცა ლუკაშენკო მოქალაქეებს სპეცრაზმითა და ჯარის ძალით პასუხობს.

აქციებზე ცრემლსადენი გაზით, ხელკეტებით, წყლის ჭავლითა და რეზინის ტყვიებით დაშავდა ათასობით ადამიანი, დააკავეს შვიდი ათასზე მეტი. ბელარუსის ჯანდაცვის სამინისტროს ინფორმაციით, აქციებზე გარდაიცვალა 2 ადამიანი, თუმცა ქვეყნის შინაგან საქმეთა სამინისტრო მხოლოდ ერთის გარდაცვალებას ადასტურებს. გავრცელდა ვიდეოც, სადაც ჩანს, როგორ კლავენ აქციის ერთ-ერთ მონაწილეს.

ქვეყნის დატოვება მოუწია საპრეზიდენტო კანდიდატს, სვეტლანა ტიხანოვსკაიას. თავდაპირველად გავრცელდა ვიდეომიმართვა, რომელშიც მან მომიტინგეებს დანებებისკენ მოუწოდა. არსებობს ვარაუდი, რომ ეს ვიდეო დადგმულია და იძულებითაა ჩაწერილი. მეორე ვიდეომიმართვაში კი ტიხანოვსკაიამ განაცხადა, რომ მზად არის გახდეს ეროვნული ლიდერი და ბრძოლა გააგრძელოს.

ევროპული სახელმწიფოების საპირწონედ არჩევნების შედეგები აღიარა რუსეთმა და ოკუპირებულმა აფხაზეთმა. მეტიც, კრემლმა ბელარუსს კოლექტიური სწრაფი რეაგირების ძალების მეშვეობით დახმარება შესთვაზა აქციების დასაშლელად.