ქართული ოცნების დეპუტატმა, ლევან მაჭავარიანმა, პარლამენტის პლენარულ სხდომაზე სიტყვით გამოსვლისას განაცხადა, რომ ხელისუფლება "აბსოლუტურად ყველაფერს უფრთხილდება რაც კი ჩვენს გენეტიკაშია კოდირებული". მისივე თქმით, ეს ყველაფერი " ბრძოლის ფასად უჯდებათ".

"უპრეცედენტო გადაწყვეტილება იყო, რომ უმაღლესი განათლება გახდა უფასო, რომელიც აქამდე არ ყოფილა. ასევე, ჩვენი ნაბიჯები, რომელსაც ახლა ვდგამთ - ქონების გადასახადის მოხსნა. 40 ათას ლარიანი ზღვარი იხსნება და ჩვენი დაახლოებით 80 ათასი თანამოქალაქე თავისუფლდება საგადასახადო წნეხისგან. ასევე, საპენსიო გადასახადებზე ამნისტია - ახლა უნდა შევიდეს ცვლილებები, რომელიც ძალიან ბევრ კომპანიას უხსნის ამ საგადასახადო წნეხს. ეს ის ნაბიჯებია, რომელიც მოჰყვება ეკონომიკურ ზრდას. ასევე, მინდა გამოვყო უმნიშვნელოვანესი დღის წესრიგი, რომელიც დღეს დგას ჩვენი ქვეყნის წინაშე - ჩვენ საქართველოს ვუბრუნებთ ისტორიულ როლს დაკავშირებადობის კუთხით. ჩვენ ამ გაზრდილი ეკონომიკით ხელს ვუწყობთ ინფრასტრუქტურის განვითარებას. ეს ყველაფერი ჩვენთვის ხომ არ კეთდება? — ეს ყველაფერი კეთდება ჩვენი შვილებისთვის, ჩვენი მომავალი თაობებისთვის.

საქართველო იბრუნებს ისტორიულ ფუნქციას შუა კორიდორში დაკავშირებადობის კუთხით. მინდა ყველას შევახსენო ყველას, რომ ვართ 30-საუკუნოვანი უწყვეტი გენის ერი. რაც კი ჩვენს გენეტიკაში არის კოდირებული, აბსოლუტურად ყველაფერს უფრთხილდება ჩვენი ხელისუფლება. ჩვენი ტრადიციები, კულტურა, ჩვენი იდენტობა, სარწმუნოება. ჩვენ ვიცავთ ჩვენს მამულს, ენას და სარწმუნოებას. ასეთი სუვერენული, ასეთი დამოუკიდებელი საქართველო, დამოუკიდებლობის მოპოვებიდან არასდროს ყოფილა. ყველა კარგად ხედავს თუ როგორი მუშაობით და როგორი ბრძოლის ფასად გვიჯდება ეს ყველაფერი. ჩვენი მოქალაქეების აბსოლუტური უმრავლესობა აღიქვამს სწორად იმას, რომ მშვიდობის და სტაბილურობის ერთადერთი გარანტი ამ ქვეყანაში არის ქართული ოცნება, ბიძინა ივანიშვილის ხელმძღვანელობით", — განაცხადა ლევან მაჭავარიანმა