პარტია გახარია საქართველოსთვის ლიდერი, გიორგი გახარია პარტიების აკრძალვასთან დაკავშირებულ საკონსტიტუციო სარჩელში მათი პარტიის დამატებას გამოეხმაურა. მან X-ზე დაწერა, რომ "ივანიშვილის რეჟიმმა პარლამენტში ერთადერთი ოპოზიციური პარტიაც კი ვერ აიტანა, რადგან მათ არაფერი აქვთ საპასუხო კრიტიკული ხმისთვის." მისივე თქმით, იმის მიუხედავად აკრძალავენ თუ არა მათ პარტიას, ისინი უკან არ დაიხევენ " საქართველოს დემოკრატიის აღდგენისა და მისი ევროპული და ევროატლანტიკური გზის დაცვის საქმეში".

"ქართულმა ოცნებამ ჩვენი პარტია გახარია საქართველოსთვის საკონსტიტუციო სასამართლოს იმ სარჩელს დაუმატა, რომელიც ოპოზიციური პარტიების აკრძალვას ისახავს მიზნად.

მიუხედავად მძიმე შეზღუდვებისა, ჩვენ თანმიმდევრულად ვმონაწილეობდით ყველა არჩევნებში, რომელსაც პოლიტიკური ცვლილების ერთადერთ მშვიდობიან და დემოკრატიულ გზად მივიჩნევთ. ჩვენი პარტია რჩება ერთადერთ ოპოზიციურ პარტიად, რომელიც ამჟამად პარლამენტშია წარმოდგენილი. ჩვენზე მომართული სამიზნით, ივანიშვილი ცდილობს ქვეყნის ერთადერთი ფუნქციური საპარლამენტო ოპოზიციის აკრძალვას. მიუხედავად საპარლამენტო უმრავლესობისა, ივანიშვილის რეჟიმმა პარლამენტში ერთადერთი ოპოზიციური პარტიაც კი ვერ აიტანა, რადგან მათ არაფერი აქვთ საპასუხო კრიტიკული ხმისთვის.

ეს არის ივანიშვილის რეჟიმის კიდევ ერთი ნაბიჯი საქართველოში ოფიციალურად ავტორიტარული მმართველობის დამყარებისა და პოლიტიკური ოპოზიციის ჩახშობისკენ.

აგვკრძალავენ თუ არა, ჩვენ უკან არ დავიხევთ საქართველოს დემოკრატიის აღდგენისა და მისი ევროპული და ევროატლანტიკური გზის დაცვის საქმეში", — წერს გიორგი გახარია.

ცნობისთვის, გუშინ, 14 სექტემბერს უმრავლესობის სხდომის შემდეგ გამართულ ბრიფინგზე ქართული ოცნების უმრავლესობის ლიდერმა, ირაკლი კირცხალიამ განაცხადა, რომ პარტია გახარია საქართველოსთვის საკონსტიტუციო სასამართლოს სარჩელს დაემატება და მის გაუქმებას მოითხოვენ. როგორც კირცხალიამ აღნიშნა, გუნდმა მათ შანსი მისცა, თუმცა მათმა ქმედებებმა და კონსტიტუციური წყობილების "არაღიარებამ" ეს გადაწყვეტილება განაპირობა. კირცხალიამ ასევე აღნიშნა, რომ ამ სარჩელის პირობებში მათ პარლამენტსა და საკრებულოებში დეპუტატების მანდატების შეწყვეტა არ მოუთხოვიათ.

შეგახსენებთ, გიორგი გახარიამ საქართველო 2025 წლის ზაფხულში დატოვა და გერმანიაში იმყოფება. 2025 წლის 12 ნოემბერს პროკურატურამ მის წინააღმდეგ საქმე აღძრა 2019 წლის 20 ივნისის მოვლენებთან დაკავშირებით. მას ორი ან მეტი პირისთვის მძიმე დაზიანების განზრახ მიყენების ორგანიზებას და ასევე ჩორჩანას პოლიციის საგუშაგოს საქმეზე უფლებამოსილების ბოროტად გამოყენებას ედავებიან.