"თევზი თავიდან ყროლდება. სამწუხაროდ, ჩვენი ქვეყანა ზუსტად სოლოლაკის სასახლიდან აყროლდა. ამ ყროლის თავი და წყარო არის ბიძინა ივანიშვილი და სანამ იქ და ხელისუფლებაში იქნება, სანამ ეს მარიონეტები და ჩმორების კორპორაცია იქნება, მანამდე სამართალს ჩვეულებრივი ადამიანი ვერ იპოვის", — ასე გამოეხმაურა ევროპული საქართველოს ლიდერი გიგი უგულავას მთავარი არხის მეწილის, გიორგი რურუასთვის პატიმრობის შეფარდებას.

უგულავამ სასამართლოს მონსტრების კორპორაცია და "ავგიას თავლა" უწოდა და განაცხადა, რომ ივანიშვილმა ის "საჯიჯგნად ჩაუგდო თავის ყმებს".

"სასამართლო არის ეს ცარიელი კედლები, შიგნით მოკალათებულია კორუმპირებული, ჩმორი მოსამართლეები. რას ველოდით ამ მოსამართლისგან? ჩარგული თავი და თვალებს, რომ ზევით-ქვევით აცეცებს. მასეთმა კაცმა რა გადაწყვეტილება უნდა მიიღოს?", — განაცხადა უგულავამ სასამართლოს ეზოში.

მთავარი არხის მეწილეს, გიორგი რურუას სასამართლომ 4 წელი მიუსაჯა. რურუას ადვოკატის, დიმიტრი საძაგლიშვილის თქმით, მიუხედავად იმისა, რომ სასამართლო სისტემის ნდობა არ აქვთ, განაჩენს სააპელაციო სასამართლოში მაინც გაასაჩივრებენ.

"ჩვენ არაერთხელ ვამბობდით, რომ რურუას საქმეზე გადაწყვეტილებას არ იღებს ვალერიან ბუგიანიშვილი. არ არის ეს მოსამართლე რომელიც შინაგანი რწმენის ან კანონის საფუძველზე ხელმძღვანელობს, ის არის უბრალოდ პოლიტიკური მითითებების შემსრულებელი მოსამართლე", — აღნიშნა საძაგლიშვილმა.

რურუა ერთ-ერთია იმათგან, ვის გათავისუფლებასაც ოპოზიცია 8 მარტის შეთანხმების ფარგლებში ითხოვდა. გიორგი რურუა 2019 წლის 18 ნოემბერს იარაღის უკანონო ტარების ბრალდებით დააკავეს. მისი უფლებადამცველი და პარტნიორი ნიკა გვარამია აცხადებს, რომ გიორგი რურუას იარაღი ჩაუდეს. დაკავებული ბრალს არ აღიარებს და ამბობს, რომ იარაღი მას საერთოდ არ უნახავს.

მოგვიანებით პროკურატურამ გიორგი რურუას ბრალი დაუმძიმა. პროკურატურის განცხადებით, ბრალს დაემატება ახალი მუხლი სასამართლო გადაწყვეტილების შეუსრულებლობისა და მისი შესრულებისათვის ხელის შეშლის შესახებ. ბრალდების მხარე აცხადებს, რომ გიორგი რურუამ უარი განაცხადა სასამართლოს განჩინების მიხედვით დნმ-სა და ხელის კვლევების ნიმუშის აღების თაობაზე. მიმდინარე წლის 15 იანვარს კი გამომძიებელმა განაცხადა, რომ რურუასგან დნმ-ის ნიმუში ნებაყოფლობით აიღეს.