საგარეო საქმეთა სამინისტრო კონგრესის ქვედა პალატის მიერ აქტის მიღებას გამოეხმაურა, რომლითაც შესაძლოა საქართველოს დახმარების 15 პროცენტი შეუჩერდეს. როგორც უწყებაში აცხადებენ, აღნიშნული ჩანაწერი კონგრესის საზედამხედველო ფუნქციით არის ნაკარნახევი და მისი ამოქმედება არ ატარებს სავალდებულო ხასიათს.

"პროგრამების კანონპროექტი კვლავ ითვალისწინებს საქართველოსთვის სოლიდურ ფინანსურ დახმარებას და 132 025 000 დოლარს აღწევს. კანონპროექტის თანახმად, თანხის 15 პროცენტის გადაცემა სავალდებულო არ არის, სანამ სახელმწიფო მდივანი არ დაადგენს და კომიტეტებს არ წარუდგენს ანგარიშს იმის თაობაზე, რომ საქართველოს მთავრობა ეფექტურ ნაბიჯებს დგამს დემოკრატიული ინსტიტუტების გაძლიერების, კორუფციასთან ბრძოლის, კერძო სექტორში კანონის უზენაესობისა და საერთაშორისოდ აღიარებული სტანდარტების დაცვის კუთხით. აღნიშნული ჩანაწერი კონგრესის საზედამხედველო ფუნქციით არის ნაკარნახევი და მისი ამოქმედება არ ატარებს სავალდებულო ხასიათს. აღსანიშნავია, რომ იმ საკითხებში, რომლის თაობაზე კონგრესი სახელმწიფო დეპარტამენტის ანგარიშს ითხოვს, საქართველო პროგრესირებს, რაც აღიარებულია თავად საერთაშორისო საზოგადოებისა და ჩვენი მთავარი სტრატეგიული პარტნიორის მიერ", — ნათქვამია საგარეო უწყების მიერ On.ge-სთვის მიწოდებულ ინფორმაციაში.

სამინისტროში ყურადღებას ამახვილებენ საბოლოო ტექსტის დამტკიცების პროცედურაზეც. მათი თქმით, კანონის მიღებამდე ამჟამად აშშ-ის სენატმა უნდა დაამტკიცოს კანონპროექტის საკუთარი ვერსია, რომლის შემდგომ ორივე პალატის ვერსია უნდა შეჯერდეს ე.წ. კონფერენციაზე. შეჯერებული ტექსტს კენჭს უყრის აშშ-ის კონგრესის სრული შემადგენლობა და დამტკიცების შემდგომ კანონპროექტი გადაეგზავნება აშშ-ის პრეზიდენტს ხელმოსაწერად.

24 ივლისს კონგრესის წარმომადგენლობითმა პალატამ დაამტკიცა აქტი, რომლითაც შესაძლოა საქართველოს დახმარების 15 პროცენტი შეუჩერდეს. აღნიშნული დოკუმენტი სახელმწიფო დეპარტამენტისა და საგარეო პროგრამების დაფინანსებას ადგენს.

კენჭისყრისას აქტს მხარი 224 კონგრესმენმა დაუჭირა მხარი, წინააღმდეგი 189 იყო.

დოკუმენტის თანახმად, შესაძლოა, ამერიკის შეერთებულმა შტატებმა 2021 წლისთვის საქართველოსთვის გამოყოფილი ფინანსური დახმარების 15 პროცენტი "დააკავოს", მანამ, სანამ მთავრობა დემოკრატიული ინსტიტუტების გაძლიერებისთის ეფექტიან ნაბიჯებს არ გადადგამს შემდეგი მიმართულებით

• დემოკრატიული ინსტიტუტების გაძლიერების თვალსაზრისით;
• მთავრობაში კორუფციასთან ბრძოლის კუთხით, მათ შორის, ანტიკორუფციული კანონებისა და რეგულაციების შემოღებით;
• უზრუნველყოს კანონის უზენაესობა კერძო სექტორში, რას შესაბამისობაში უნდა იყოს საერთაშორისოდ აღიარებულ სტანდარტებთან, მათ შორის, უცხოური ბიზნესის უფლებების დაცვით, რათა შეეძლოთ შევიწროვების გარეშე ოპერირება და საქართველოში განხორციელებული ინვესტირების შედეგად ფინანსური სარგებლის მიღება.

"სახსრების 15 პროცენტი არ გამოიყოს, სანამ სახელმწიფო მდივანი არ განსაზღვრავს და არ წარუდგენს ანგარიშს კომიტეტებს, რომ საქართველოს მთავრობა დგამს ეფექტიან ნაბიჯებს დემოკრატიული ინსტიტუტების გასაძლიერებლად, კორუფციასთან საბრძოლველად და კერძო სექტორში კანონის უზენაესობის უზრუნველსაყოფად, რაც შესაბამისი იქნება საერთაშორისოდ აღიარებულ სტანდარტებთან", — წერია დოკუმენტში.

კანონპროექტში საუბარია დახმარების არგამოყოფის გამონაკლის შემთხვევებზეც, რომლის მიხედვით, სახსრების შეჩერება არ უნდა შეეხოს იმ პროგრამებს, რაც დემოკრატიის, კანონის უზენაესობის, სამოქალაქო საზოგადოებისა და მედიის განვითარებას უწყობს ხელს. ასევე, იმ პროგრამებსაც, რომლებიც გენდერული ნიშნით ძალადობისა და მოწყვლადი ჯგუფების მიმართ ძალადობის შემცირებისთვისაა.

პროექტზე თანდართულ დოკუმენტში საუბარია, რომ სახელმწიფო მდივანმა უნდა განსაზღვროს, ახორციელებს თუ არა საქართველოს ხელისუფლება საარჩევნო რეფორმების იმპლემენტაციას, პატივს სცემს სასამართლო დამოუკიდებლობას, ახორციელებს თუ არა საჭირო რეფორმებს გამჭვირვალობისთვისა და საჯარო ინფორმაციაზე ხელმისაწვდომობისთვის, თუ იცავს სამოქალაქო საზოგადეობის, მედიისა და ოპოზიციური პარტიების უფლებებს. ამასთან, სახელმწიფო მდივანმა უნდა შეაფასოს, რამდენად შემცირებული იქნება მთავრობის საქმიანობაზე ოლიგარქების არაფორმალური გავლენები.

კანონპროექტს სენატშიც უნდა უყარონ კენჭი. მიღების შემთხვევაში ის პრეზიდენტს ხელმოსაწერად გადაეცემა.