დაავადებათა კონტროლის ცენტრის ცხელი ხაზი 116 001
ჯანდაცვის სამინისტროს ცხელი ხაზი 15 05
მთავრობის ცხელი ხაზი 144

საქართველოს ჯანდაცვის მინისტრი, ეკატერინე ტიკარაძე გარდაბნის მოსახლეობას თხოვნით მიმართავს, რომ ითანამშრომლონ ეპიდემიოლოგებთან, რომლების ამ მომენტისთვის იმყოფებიან გარდაბანში, ატარებენ აქტიურ თერმოსკრინინგს და მიზნობრივ ტესტირებას. მისი თქმით, ეს ყველაფერი უზრუნველყობს დაცულობას, რათა მთავრობას არ დასჭირდეს კიდევ ერთხელ მიმართოს უკიდურეს ზომებს.

მინისტრი აღნიშნავს, რომ ახალი 24 შემთხვევა საყურადღებოა, თუმცა არა საგანგაშო და მნიშვნელოვანია, ყველა ის რეკომენდაცია, რომელიც მოწოდებულია მსოფლიო ჯანდაცვის ორგანიზაციისგან, ჯანდაცვის სამინისტროსა და დაავადებათა კონტროლის ცენტრისგან, ზედმიწევნით იყოს დაცული.

"მე კვლავ მივმართავ მოსახლეობას, რომ გამოიჩინონ სოციალური პასსუხისმგებლობა, დაიცვან სოციალური დისტანცირება, გამოიყენონ პირბადე და მიმართონ ყველა იმ ღონისძიებას, რომელიც არის 1 თებერვლიდან მოწოდებული", — აცხადებს ტიკარაძე.

ოფიციალური ინფორმაციით, დღეს საქართველოში კორონავირუსის 24 ახალი შემთხვევა დადასტურდა. დაავადებათა კონტროლის ეროვნული ცენტრის ხელმძღვანელის, ამირან გამყრელიძის ინფორმაციით, ბოლო პერიოდში ამ დასახლებაში ჯამში 34 ინფიცირების შემთხვევაა დაფიქსირებული, ხოლო დღევანდელი 24 შემთხვევიდან, 10 გაჩიანის კლასტერიდან მოდის.

როგორც გამყრელიძე აღნიშნავს, თუ გარდაბნის სოფლებში კორონავირუსის ტესტირებაზე მოსახლეობის დამყოლობა არ იქნება, შესაძლოა, რომ ეს სოფლები ჩაიკეტოს. ამის შესახებ გამყრელიძემ დღეს გამართულ ბრიფინგზე განაცხადა.

ბოლო მონაცემებით, ქვეყანაში კორონავირუსის სულ 1073 შემთხვევაა გამოვლენილი, აქედან 907 ადამიანი უკვე გამოჯანმრთელდა, ხოლო 16 გარდაიცვალა. კარანტინის რეჟიმში რჩება 5 692 პირი, სტაციონარში მეთვალყურეობის ქვეშ — 275. უცხოეთიდან საქართველოში სამკურნალოდ 41 ადამიანი გადმოიყვანეს.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: